شہباز شریف دی مولانا فضل الرحمان نال ملاقات، سرکار دے خلاف سانجھی حکمت عملی تے اتفاق
اسلام آباد: مسلم لیگ (ن) دے صدر شہباز شریف نے جمعیت علمائے اسلام (ف) دے سربراہ مولانا فضل الرحمان نال ملاقات کیتی اے جہدے وچ دوواں رہنماواں نے سرکار دے خلاف سانجھی حکمت عملی تے اتفاق کیتا گیا۔
اسلام آباد وچ مسلم لیگ (ن) دے صدر شہباز شریف دی قیادت وچ خواجہ آصف، احسن اقبال، خواجہ سعد رفیق تے ایاز صادق نے مولانا فضل الرحمان نال ملاقات کیتی۔ ملاقات دے دوران دوواں رہنماواں نے اپوزیشن دی آل پارٹیز کانفرنس دے انعقاد سنے دوجے سارے متعلقہ امور تے تبادلہ خیال کیتا۔
ملاقات مگروں میڈیا نال گل کردیاں شہباز شریف آکھیا مولانا فضل الرحمان دے نال ملاقات وچ ااسیں اوہناں دی گل سنی تے اوہناں نے ساڈی گل سنی، اسیں پارلیمان دے اندر تے باہر سیاسی جماعتاں نوں اک پلیٹ فارم تے اکٹھا کراں گے، اے پی سی ہووے گی تے ضرور ہووے گی، ساری جماعتاں دی موجودگی وچ فیصلے ہون گے، اسیں سب رل کے بیٹھ کے اے پی سی بلان گے، اے پی سی بارے رہبر کمیٹی دے اجلاس وچ مشاورت کراں کرن گے۔قائدحزب اختلاف نے آکھیا اسیں عمران خان نوں نااہلی تے نالائقی دی بنیاد تے مین آف دی ایئر قرار دتا اے، نوازشریف دی قیادت وچ ہزاراں میگا واٹ بجلی دے پلانٹ لائے، اسیں لوڈشیڈنگ ختم کیتی پر اج دوبارہ لوڈشیڈنگ ہو رہی اے، ایس موقع تے فضل الرحمان دا کہنا سی شہباز شریف دے رابطیاں دا خیر مقدم کرنے آں، ملاقات وچ سانجھی حکمت عملی اپنان تے اتفاق ہویا اے، سرکار دے خلاف تحریک تے اتفاق اے پر طریقہ کار تے گل کرنا ضروری اے، موجودہ صورتحال دا تقاضا اے اسیں باہمی تحفظات نوں دور کریئے، اپوزیشن دی تقسیم دیس دے مفاد وچ نہیں، اپوزیشن مشترکہ تے مستحکم حکمت عملی بنائے گی۔





















