پاکستان دا سائبر سپیس سکیورٹی پالیسی متعارف کران دا فیصلہ
اسلام آباد: سرکار نے ‘سائبر سپیس’ نوں محفوظ بنان دا فیصلہ کردیاں ‘سائبر سپیس سکیورٹی پالیسی’ متعارف کران دا فیصلہ کیتا اے۔ سیکرٹری وزارت انفارمیشن ٹیکنالوجی شعیب صدیقی دے مطابق سائبر سپیس سکیورٹی پالیسی تے کم شروع کر دتا گیا اے جہڑا چھیتی پورا کر لیا جائے گا تے کابینہ وچ منظوری لئی پیش کیتا جائے گا۔
سائبر سپیس سکیورٹی پالیسی دی مدد نال پاکستانی انٹرنیٹ صارفین دے ڈیٹا نوں وی کنٹرول کیتا جا سکے گا۔ ایس بارے سارے فریقین نال وی مشاورت کیتی جائے گی۔
ڈیٹا نوں محفوظ بنان لئی ادارے وی بنائے جان گے جہڑے پاکستان وچ سارے انٹرنیٹ صارفین دے ڈیٹا نوں محفوظ بنان لئی کم کرن گے۔ وزارت انفارمیشن ٹیکنالوجی دے ذرائع نے دسیا اے بھارت ولوں کیتے گئے سائبر حملیاں وچ 100توں ودھ سرکاری افسران دے ڈیٹا تک رسائی حاصل کرن دی کوشش کیتی گئی اے۔
اوہناں دا کہنا سی جیویں کسے وی دیس دی فضائی حدود داخل ہون لئی اجازت چاہیدی ہوندی اے ایسے طرح پاکستان دے انٹرنیٹ دی حدود توں کسے قسم دا ڈیٹا حاصل کرن لئی اجازت ضروری ہووے گی جے کوئی ہیک کرکے ڈیٹا حاصل کرن دی کوشش کرے گا تے اوہدے لئی ‘پراویکٹیو’ طریقہ کار نال ایہناں حملیاں نوں نکام بنایا جائے گا۔





















