دواواں دی دستیابی یقینی بنان لئی قیمتاں وچ وادھا کیتا: ڈاکٹر فیصل سلطان

اسلام آباد: وزیراعظم دے معاون خصوصی برائے صحت ڈاکٹر فیصل سلطان نے جان بچان والی دواواں دی قیمتاں وچ وادھے دے حکومتی فیصلے دا دفاع کردیاں ہوئیاں آکھیا مارکیٹ توں غائب ہون والی دواواں دی قیمتاں وچ وادھا کیتا گیا۔ میڈیا نال گل کردیاں ڈاکٹر فیصل سلطان آکھیا جہڑیاں دواواں دا ذکر ہو رہیا اے سستی لائف سیونگ تے پرانے فارمولے تے نیں ایہناں دواواں دی قیمتاں تے مناسب تبدیلی نہ آن دی وجہ توں مارکیٹ توں غائب ہو جاندیاں نیں۔

اوہناں دا کہنا سی مارکیٹ وچ ناپید دواواں نوں تھوڑے توں وادھے دی لوڑ سی۔ قیمتاں وچ مناسب وادھا نہ ہون پاروں ایہ دواواں دستیاب نہیں ہوندیاں۔ غائب ہون والی دواواں بلیک وچ ملن لگدیاں نیں۔ اوہ دواواں جہڑے لوکاں نوں مہنگی مل رہیاں سی ہن مناسب ویلے وچ دستیاب ہو ن گیاں۔

معاون خصوصی برائے صحت نے ہور آکھیا سرکار تے ڈریپ دا کم دواواں دی دستیابی نوں یقینی بنانا وی اے۔ اسیں دواواں دی قیمتاں اینی ودھائیاں نیں کہ لوکاں تک اپڑ سکن۔

اسیں دواواں بنان والی کمپنیاں دے دباء وچ نہیں آئے۔ اک نویں پرائسنگ پالیسی تے کم کر رہے آں۔ دواواں دی قیمتاں دی لسٹ ویب سائٹ تے لائی جائے گی۔

سارے صحت دے اداریاں وچ اصلاحات لیائی جا رہیاں نیں۔

اپنا تبصرہ گھلو