مولانا فضل الرحمان دے قریبی ساتھی موسیٰ خان گرفتار
پشاور: نیب نے مولانا فضل الرحمان دے قریبی ساتھی تے سابق ڈی ایف او موسیٰ خان نوں گرفتار کرکے احتساب عدالت پیش کر دتا۔
اوہناں دے خلاف آمدن توں ودھ اثاثہ جات وچ انکوائری جاری سی، ذرائع دا کہنا اے نیب نے سابق ڈی ایف او نوں سوالنامہ گھلیا سی۔
جہناں دے جوابات جمع کران سابق ڈی ایف او نیب دفتر پشاور جا رہے سن کہ اوہناں نوں راہ وچ ای متنی دے نیڑے نیب نے گرفتار کر لیا۔ سابق ڈی ایف او جے یو آئی (ف) دے سربراہ مولانا فضل الرحمان دے قریبی رفقاء وچ شامل نیں تے اوہ جے یو آئی دے مرکزی کونسل دے رکن تے ڈی آئی خان وچ تحصیل پہاڑ پور دے امیر نیں جد کہ اوہناں دا وڈا پتر طارق بلوچ سربراہ جے یو آئی دا پرسنل سیکرٹری اے۔
دوجے پاسے امیر جمعیت علماء اسلام کے پی کے سینیٹر مولانا عطاء الرحمان نے موسیٰ خان دی گرفتاری دی شدید لفظاں وچ مذمت کردیاں آکھیا اے اجہے اوچھے ہتھکنڈیاں توں مرعوب نہیں ہوواں گے، موسیٰ خان تحصیل امیر نیں نیب جے کسے وڈے نوں وی گرفتار کرے تے پچھے نہیں ہٹاں گے، موسیٰ خان نوں چھیتی چھڈیا جائے۔





















