سپریم کورٹ دا سانحہ اے پی ایس دی جوڈیشل کمیشن رپورٹ پبلک کرن دا حکم

اسلام آباد(بھلیکھا ٹی وی )سپریم کورٹ نے سانحہ آرمی پبلک سکول بارے جوڈیشل کمیشن رپورٹ پبلک کرن دا حکم دے دتا۔ سپریم کورٹ نے سانحہ آرمی پبلک سکول بارے جوڈیشل کمیشن رپورٹ پبلک کرن تے اٹارنی جنرل دے رپورٹ تے کمنٹس نوں بھی پبلک کرن دا حکم دے دتا۔ شہیداں دے والدین نے سماعت دے دوران آکھیا ساری عمر تھلے والیاں دا احتساب ہویا، ایس واقعہ وچ اُتے والے لوکاں نوں پھڑیا جائے، اسیں زندہ دفن ہو چکے آں، سانحہ آرمی پبلک سکول ٹارگٹ کلنگ اے جہدے تے جسٹس فیصل عرب نے آکھیا تسیں چاہندے او سکیورٹی وچ غفلت دے ذمہ داراں نوں وی سزا ملے، ایس کیس نوں اسیں چلاواں گے۔ چیف جسٹس نے آکھیا المیہ اے چھوٹے لوکاں نوں ذمہ دار قرار دے دتا جاندا اے، وڈیاں توں کجھ پچھیا نہیں جاندا، ایہ روایت ختم ہونی چاہیدی اے۔ جسٹس اعجاز الاحسن آکھیا سانحہ آرمی پبلک سکول پوری قوم دا دکھ اے۔ چیف جسٹس آکھیا سرکار نوں ایکشن لینا چاہیدا اے ایہے واقعات نہ ہون، اوہ لوک جہڑا مقصد حاصل کرنا چاہندے سن اوہناں نے حاصل کیتا، سکیورٹی اداریاں نوں ایس سازش دی اطلاع ہونی چاہیدی سی، اینی سکیورٹی وچ وی عوام محفوظ نہیں۔