عمران گلگت الیکشن دی وجہ توں شہباز شریف نوں گرفتار کروانا چاہندے نیں: ن لیگ

اسلام آباد(بھلیکھا ٹی وی ) ترجمان (ن) لیگ مریم اورنگزیب آکھیا اے عمران خان شہباز شریف نوں گلگت بلتستان تے لوکل گورنمنٹ الیکشن دی وجہ توں گرفتار کروانا چاہندے نیں۔ مسلم لیگ (ن) دی ترجمان مریم اورنگزیب نے اسلام آباد وچ پریس کانفرنس نال خطاب کردیاں آکھیا جہڑے عوام دا مینڈیٹ نہ لے کر آئے ہون اوہ عوام دی تکلیف دا کیہ ازالہ کرے گی، اک نالائق تے کرپٹ ٹولا پاکستان تے مسلط کیتا گیا، اسیں ایس سرکار دے نال پارلیمان دے اندر تے باہر کوئی تعاون نہیں کراں گے، سپیکر پارلیمانی لیڈر دا اجلاس طلب کرن دا اختیار نہیں رکھدے اوہناں دے نال وی کوئی تعاون نہیں کیتا جائے گا۔ مریم اورنگزیب آکھیا 58والیم دے اندر اک لائن اجہی نہیں جہڑی شہباز شریف تے منی لانڈرنگ یا کرپشن دا الزام لاندی ہووے، گواہواں دے بیانات وچ شہباز شریف دا ناں تک نہیں اے۔ عمران خان شہباز شریف نوں گلگت بلتستان تے لوکل گورنمنٹ الیکشن دی وجہ توں گرفتار کروان چاہندے نیں۔ اوہناں نے اے پی سی دے فیصلیاں نوں مفلوج کرن لئی شہباز شریف نوں گرفتار کرن دا حکم دتا۔