ٹھٹھہ واٹر سپلائی تے پارک لین ضمنی ریفرنس وچ آصف زرداری تے فرد جرم لاگو

اسلام آباد: آصف زرداری تے پارک لین ضمنی تے ٹھٹھہ واٹر سپلائی ریفرنس وچ فرد جرم لاگو کر دتی گئی۔ اسلام آباد دی احتساب عدالت وچ جعلی اکاؤنٹ کیساں دی سماعت ہوئی جہدے وچ آصف زرداری سنے دوجے ملزمان پیش ہوئے، ایس موقع تے جج احتساب عدالت آکھیا سارے ملزم موجود نیں ایس لئی فرد جرم لاگو کرن دی کاروائی شروع کرنے آں جہدے بعد آصف زرداری تے ریفرنس وچ نامزد دوجے ملزمان نوں چارج شیٹ فراہم کردتی گئی۔

فرد جرم دیاں کاپیاں فراہم کرن دے بعد عدالت نے پارک لین ضمنی ریفرنس وچ آصف زرداری سنے 19تے ٹھٹھہ واٹر سپلائی ریفرنس وچ 15ملزماں تے فرد جرم لاگو کر دتی۔ عدالت ولوں فرد جرم لاگو کرن تے آصف زرداری نے صحت جرم توں انکار کر دتا۔ آصف زرداری ولوں صحت جرم توں انکار تے عدالت نے پارک لین ضمنی ریفرنس وچ نیب نوں 20اکتوبر جد کہ ٹھٹھہ واٹر سپلائی ریفرنس وچ 21اکتوبر نوں گواہواں نوں پیش کرن دا حکم دے دتا۔