توشہ خانہ ریفرنس، اشتہاری ملزم نوازشریف دے اثاثے ضبط کیتے جان، تحریری حکم جاری

اسلام آباد: توشہ خانہ ریفرنس وچ عدالت نے اشتہاری ملزم نوازشریف دے ظاہر شدہ اثاثے ضبط کرن دا حکم دتا گیا اے۔ توشہ خانہ ریفرنس وچ احتساب عدالت نے تحریری حکم جاری کر دتا۔ حکم نامہ وچ آکھیا گیا اے اشتہاری ملزم نوازشریف دے ریفرنس وچ ظاہر شدہ اثاثے ضبط کیتے جان، نوازشریف دی پراپرٹیاں، گڈیاں، بینک اکاؤنٹس قرق کرن بارے رپورٹ وی پیش کیتی جائے۔ چیئرمین ایس ای سی پی، ڈپٹی کمشنر لہور، شیخوپورہ، راولپنڈی، ایبٹ آباد نوں عدالتی حکم تے عملدرآمد دی ہدایت کیتی گئی اے۔

نوازشریف دے وکھو وکھ نجی بینکاں وچ 3 غیر ملکی کرنسی سنے 8 اکاؤنٹس قرقی وچ شامل نیں۔ نوازشریف دے محمد بخش ٹیکسٹائل ملزوچ 4 لکھ 67 ہزار ، اتفاق ٹیکسٹائل ملز وچ 48ہزار 606 شیئرز قرق ہون گے۔ حدیبیہ پیپرملزوچ نواز شریف 3لکھ 43 ہزار ، حدیبیہ انجینئرنگ کمپنی 22 ہزار شیئرز دے مالک اے۔ نواز شریف دے 5 بینک اکاؤنٹس وچ 6 لکھ 12 ہزار روپے موجود نیں۔غیرملکی کرنسی والے اکاؤنٹس وچ 566 یورو، 698 امریکی ڈالرز تے 498 برطانوی پانڈزموجود اے۔

لہوردے موضع مانک وچ 936 کنال، موضع بڈوکسانی وچ 299 کنال زرعی اراضی شامل نیں۔ نواز شریف تے اوہناں دے زیر کفالت بندیاں دے ناں لہور، شیخو پورہ ، مری تے ایبٹ آباد وچ جائیداداں نیں۔ مری وچ بنگلہ، چھانگلہ گلی ایبٹ آباد وچ 15 کنال دا مکان تے اپرمال لہورتے جائیداد اے۔ نوازشریف تے اوہناں دے زیر کفالت بندیاں دے ناں 1752 کنال توں ودھ زرعی اراضی شامل اے تے نواز شریف 1 لینڈ کروزر، 2 مرسڈیز گڈیاں سنے 2 ٹریکٹراں دے مالک نیں۔