پاکستان وچ سزا پوری کرن والے 5بھارتی جاسوس رہا
اسلام آباد: وفاق نے اسلام آباد ہائی کورٹ نوں دسیا اے پاکستان نے 5سزا یافتہ بھارتی قیدیاں نوں سزا پوری ہون تے رہا کرکے بھارت واپس بھجوا دتا اے۔ بھارتی شہریاں نوں 26اکتوبر 2020نوں رہا کیتا گیا۔ بھارتی ہائی کمیشن دے وکیل نے آکھیا اک بھارتی شہری سزا پوری کرن دے باوجود واپس نہیں جانا چاہندا سی جہنوں ڈی پورٹ کیتا گیا۔ اسلام آباد ہائی کورٹ دے چیف جسٹس اطہر من اللہ نے 8بھارتی شہریاں دی رہائی دی عرضیاں تے سماعت کیتی۔
وزارت داخلہ ولوں رپورٹ جمع کرائی گئی تے ڈپٹی اٹارنی جنرل طیب شاہ نے عدالت نوں دسیا کہ چار بھارتی قیدیاں نوں سزا مکمل ہون تے 26اکتوبر 2020نوں رہا کر دتا گیا اے۔ ڈپٹی اٹارنی جنرل آکھیا بھارت دے 3ہور قیدیاں دی حد تک ہدایات لے کے دسنا آں۔ کجھ قیدیاں دا معاملہ ریویو بورڈ دے کول اے۔ چیف جسٹس اطہر من اللہ نے ریمارکس دتے جدوں سزا مکمل ہو گئی تے تسیں کیویں ایہناں نوں ہور رکھ سکدے او، ریویو بورڈ وچوں کتھے آ گیا؟ جے سزا پوری اے تے ایہناں نوں واپس بھیج دیو۔ کیس دی ہور سنوائی 5نومبر تک ملتوی کر دتی گئی۔
