فرانس نال تعلقات، سرکار عوامی جذبات ساہمنے رکھ کے فیصلہ کرے: اسلام آباد ہائیکورٹ
اسلام آباد: ہائی کورٹ نے گستاخانہ خاکیاں دی اشاعت تے فرانس نال تعلقات منقطع کرن دا معاملہ کابینہ دے ساہمنے چُکن دا حکم دے دتا۔ گستاخانہ خاکیاں دی اشاعت تے فرانس نال سفارتی تعلقات منقطع کرن دی عرضی تے اسلام آباد ہائی کورٹ وچ سماعت ہوئی۔ ہائی کورٹ نے معاملہ وفاقی کابینہ دے ساہمنے رکھن دا حکم دیندیاں آکھیا وفاقی کابینہ عوامی جذبات نوں ساہمنے رکھ کے فیصلہ کرے۔ درخواست گزار شہدا فاؤنڈیشن دے وکیل طارق اسد عدالت دے ساہمنے پیش ہوئے تے موقف اختیار کیتا فرانس وچ خاکے شائع کرن تے ترکی، قطر سنے کئی مسلم ملکاں نے احتجاج کیتا اے۔
فرانس دی سب توں غلط گل ایہ اے اوہدے صدر نے خود دو عمارتاں تے خاکے لٹکان دا آکھیا اے۔ جسٹس محسن اختر کیانی نے ریمارکس دتے پاکستان دی سرکار نے مذمت تے کیتی اے فرانسیسی سفیر نوں دفتر خارجہ وی بلایا گیا اے، نیشنل اسمبلی توں قرارداد وی پاس ہوئی اے، پارلیمنٹ توں قرارداد دا آنا وی عوام دی ترجمانی اے۔ عدالت نے معاملہ وفاقی کابینہ نوں گھلدیاں کیس نبیڑ دتا۔
