پارلیمنٹ حملہ کیس: وزیراعظم عمران خان باعزت بری
اسلام آباد(پنجابی میڈیا گروپ)اسلام آباد دی انسداد دہشت گردی دی خصوصی عدالت نے2014 دے دھرنے دے دوران پارلیمنٹ اُتے حملے دے مقدمے وچ وزیر اعظم عمران خان نوں باعزت بری کر دتا۔ عدالت نے بریت کیتی درخواست اُتے دلائل سنن توںبعد فیصلہ محفوظ کیتا سی۔ جج راجہ جواد عباس نے محفوظ فیصلہ سنایا۔ انسداد دہشت گردی عدالت نے عمران خان دی بریت دی درخواست منظور کرلئی۔ وزیراعظم عمران خان دے وکیل نے بریت دی درخواست اُتے تحریری دلائل جمع کردئیاں ہوئیاں موقف اختیار کیتا سی کہ عمران خان نوں جھوٹے تے بے بنیاد مقدمے وچ پھنسایا گیا۔ پراسیکیوٹر نے عمران خان دے وزیراعظم بنن توں پہلاں درخواست دی مخالفت جدکہ وزیراعظم بنن دے بعد حمایت کیتی سی۔ عمران خان ایس مقدمہ وچ اشتہاری تے ضمانت اُتے سن۔اینہاں مقدمیاں وچ وزیراعظم عمران خان دے نال نال موجودہ وفاقی وزیراں وچوں شاہ محمود قریشی، پرویز خٹک سمیت تحریک انصاف دے ہور سینئر قائدین نامزد کیتے گئے، جناں وچ جہانگیر خان ترین، عامر محمود کیانی، اعجاز چودھری، علی نواز اعوان، راجا خرم نواز، شوکت یوسفزئی وی شامل نیں۔ عدالت نے سارے ملزماں نوں 12 نومبر نوں فرد جرم عائد کرن لئیسدھ لیا اے۔
