غزل

بابا نجمی

ساری قوم نچاندے پئے نیں دھرتی دے کجھ لوک
لٹ خزانہ کھاندے پئے نیں دھرتی دے کجھ لوک
اپنے ہتھیں لا کے مہندی ساڈے لہو دی ویکھ
اپنے شگن مناندے پئے نیں دھرتی دے کجھ لوک
اینا رولا پا نہیں سکدے جگ دے لکھاں ڈھول
جنا رولا پاندے پئے نیں دھرتی دے کجھ لوک
اک دیہاڑے بہہ کے کٹھے کڈھو ایہدا کھوج
سانوں کیوں لڑواندے پئے نیں دھرتی دے کجھ لوک
دوجے لوک وی ایہناں والا رنگ چڑھا نہ لین
جہڑا رنگ وکھاندے پئے نیں دھرتی دے کجھ لوک
جہناں مینوں لے کے جانا میری منزل تیک
دیوے اجے جگاندے پئے نیں دھرتی دے کجھ لوک
جنا اساں کمایا بابا کٹ کے پورا سال
اینا روز کماندے پئے نیں دھرتی دے کجھ لوک