غزل

کرم علی کیفی

دلبر تے دلدار نیں سارے دیس پنجاب دے پنجابی
اندروں باہروں پیار نیں سارے دیس پنجاب دے پنجابی
سوچا ںدے شاداب چمن دی اک پیاری خشبو نیں
کلیاں دی مہکار نیں سارے دیس پنجاب دے پنجابی
پیارے پیارے ڈاڈھے پیارے ایہہ شہباز ادب دے نیں
اکھراں دے سردار نیں سارے دیس پنجاب دے پنجابی
جد وی بولن چنگا بولن پیار دی بولی بولن ایہہ
مٹھے تے منٹھار نیں سارے دیس پنجاب دے پنجابی
سوہنے سوہنے دانشور نیں بہت سُلکھنے بیلی وی
شاعر تے فنکار نیں سارے دیس پنجاب دے پنجابی
عزتاں شرماں انکھاں والے ہن جی دار لکھاری ایہہ
غیرت دی دیوار نیں سارے دیس پنجاب دے پنجابی
شام سویرے ماں بولی دی بیٹھے راکھی کردے نیں
ایہدے پہرے دار نیں سارے دیس پنجاب دے پنجابی
پیار پریت محبت والے وچ دنیا دے کیفی جی
کردے ایہہ پرچار نیں سارے دیس پنجاب دے پنجابی