خدمتگار پنجابی
بابا نجمی
وارث بلھے ورگے بیٹھے ہنس وسار پنجابی نیں
کسراں آکھاں ماں بولی دے برخوردار پنجابی نیں
بالاں دے مونہہ جہڑے اکھر چوگے وانگوں دینے سن
اوہناں بدلے پھڑ پھڑ اوبڑ تندے یار پنجابی نیں
اچن چیتی وی نہ لاویں میرے متھے اوہناں نوں
جہڑے وی اس دھرتی اُتے بدبودار پنجابی نیں
اودھر اودھر کراں سلاماں دل دی دنیا کہندی اے
جدھر جدھر جاندے میرے باکردار پنجابی نیں
کنڈ کدے نہ لگے ربّا وچ مدانے اوہناں دی
جہڑے اپنی ماں بولی دے خدمتگار پنجابی نیں
خواجہ، فرید، محمد، وارث، نانک، بلھا، باہو، لعل
ایہہ نپجابی سچے اُچے ایہہ سردار پنجابی نیں
اپنی بولی بولن ویلے جہناں دا ساہ گھٹدا اے
بابا نجمی دے دے فتوا اوہ غدار پنجابی نیں
