صدقے جاواں واری جاواں

جان کاشمیری

نال خوشی دے جشن مناواں صدقے جاواں، واری جاواں
چُم چُم رکھاں تیرا ناواں صدقے جاواں، واری جاواں
خیر دی ہووے یاں شر دی گل، سارے پُچھدے اندر دی گل
اتھرو اتھرو منظر دی گل، پتھر جانے پتھر دی گل
ایہہ مالک تے نوکر دی گل، دساں کسراں مَیں گھر دی گل
سُن لے ہاڑے، ہَوکے ہاواں، صدقے جاواں واری جاواں
چُم چُم رکھاں تیرا ناواں، صدقے جاواں، واری جاواں
تن دا کوٹھا رج کے چویا، سِر توں اُچّا پانی ہویا
دل جھلّے نے کھوہن کیہ کھویا، اوہ وی وڈیا جو نہ بویا
لُوں لُوں اندر عشق سمویا، مرن توں پہلاں سمجھو مویا
کس نوں جا کے حال سناواں، صدقے جاواں، واری جاواں
چُم چُم رکھاں تیرا ناواں، صدقے جاواں واری جاواں
آپ پھساوے آپے پھس دا، خون دے وانگوں رگ رگ نس دا
آپے روندا آپے ہس دا، عشق دیاں خود مُشکاں کَس دا
نہ کجھ پُچھدا نہ کجھ دس دا، سانواں دے وچ ماہی وَس دا
میں کیہ جاناں رمز اداواں صدقے جاواں واری جاواں
چُم چُم رکھاں تیرا ناواں، صدقے جاواں واری جاواں
سادھو جیویں سَل دے باہجوں، ہالی جیویں ہَل دے باہجوں
اَج اے جیویں کل دے باہجوں، ویلا جیویں پَل دے باہجوں
پانی جیویں نَل دے باہجوں، مچھلی جیویں جل دے باہجوں
اِنج فراقیں مردا جاواں، صدقے جاواں واری جاواں
چُم چُم رکھاں تیرا ناواں، صدقے جاواں واری جاواں
جنگل دے وچ مور وی آپے، چل دا سوہنی ٹور وی آپے
آپے گُڈّی ڈور وی آپے، بُو کاٹے دا شور وی آپے
آکھاں تے مَیں آکھاں کسراں سادھ وی آپے چور وی آپے
آپے تُنکے آپ تناواں صدقے جاواں، واری جاواں
چُم چُم رکھاں تیرا ناواں صدقے جاواں واری جاواں