اک کُتّا
خالد حسین تھتھال
کالے رنگ دا کتا سی اک سوہنی اوس دی تھنی
ہر گھر دی اس چاٹی چٹی نالے بھنی کنی
روڑے دے وچ سنگھنے رکھاں دی اوہ چھاویں بہندا
کھرلی کڑھ وچ وڑیاں اوس نوں کوئی نہ کجھ وی کہندا
سیال رڑی تے سیوا سیکے لتاں وچ منہ دے کے
جاتک اوس نوں کدے کدائیں لا لیندے سن ڑیکے
کوئی سوانی بالاں دے نال پیکے پنڈ جد آئوندی
چائیں چائیں بالاں تائیں کتا اوہ وکھائوندی
سارے پنڈ دی راکھی کردا سارے پنڈ دا سانجھا
کرہیوں چھتر سوٹی پیندی کرہیوں پیندا مانجا
رات دیہاڑے اوہ نہ بھونکے نکے وڈے تائیں
پنڈ وچ باہروں جے کوئی آئوندا پجدا گلمے تائیں
لوگڑ ہو کے لوگڑ نہیں سی سارے پنڈ دا راکھا
پنڈوں باہر اک واڑی دے وچ نکلی اوس دی آتما
لگا لگا سالاں تائیں پنڈ پھیر لگدا رہیا
اجے چتارن لوکی اوس نوں کوئی نہ اوہدے جیہا
