غزل

منصور عزمی

لیکھا آن کے بدلے کوئی دیس میرے دِیاں ہاراں دا
اَڈیاں چُک چُک ویکھ رہے آں اَسیں تے راہ اَوَتاراں دا
کِسراں من لاں اِس دھرتی تے اج تیکر آزاد ہاں میں
میرے اِک اِک ساہ دے اُتے پہرا ہے زر داراں دا
ونی، کاروکاری اج وی رِیت ہے میری دھرتی تے
وَدھیا اے کیوں حوصلہ میرے دیس دے وچ بدکاراں دا
روز وڈیرے ، چودھری لاہوندے پَت نیں دِھیاں بھیناں دی
بے شک ورقا ورقا پھول کے ویکھ لووَ اخباراں دا
اِک دُوجے دے لہو دے پیاسے کر چھڈیا اے لوکاں نوں
کاروبار کُچجّا ایتھے دھرم دے ٹھیکیداراں دا
مظلوماں نوں بندی خانے، ظالماں دے سر سہرے
ویکھ لوو انصاف تُسی وی دیس دِیاں سرکاراں دا
عزمیؔ ایتھے حق سچ دی جو کردا اے گل بندہ
اوہدے لئی تے تِکھا کر کر رکھن مونہہ تلواراں دا