دِنے دپہریں

احمد نعیم ارشد

خشحالی دے سفنے ویکھن والیو اکھیو!
آپے ای اپنے ہنجواں دے وِچ
ڈب کے مر جا
لمے لمے نعرے لاون والیو، جِیبھوں
اپنے اپنے دنداں تھلے آ جا تے چِتھیاں جا
اوکھا ویلا ویکھ کے سر تے
لوک راج دا نعرا لاون والے لیڈر
مطلب دے لئی ہر آمر دے
نغمے گاون والے لیڈر
ساڈے جذباتاں نال کھیڈ کے
کِنے خش خش، وطنوں باہر جا بیندے نیں
ساڈے پلے پا جاندے نیں حب الوطنی
ساڈیاں ہڈیاں اتے ماس وی رہن نہیں دیندے
اپنے جسماں اتے کھرچ وی آن نہیں دیندے
چنگی گل اے
ساڈا وی تے ایہو حل اے
ساہنوں وی تے دِنے دپہریں سفنے ویکھن دا اے چا
تاہیوں ہر واری ہی ساڈے گل وِچ پے جاندا اے پھا
ساہنوں فیر وی مت نہیں آندی
تھاں تھاں متھا ٹیکن والی
ساڈے اندوں لت نہیں جاندی
دِنے دپہریں
خشحالی دے سفنے ویکھن والیو اکھیو!
آپے ای اپنے ہنجواں دے وِچ
ڈب کے مر جا
لمے لمے نعرے لاون والیو
جِیبھوں
اپنے اپنے دنداں تھلے آ جا تے چِتھیاں جا