عید
احمد نعیم ارشد
پت لئی گڈیاں
تے دھی لئی گُڈیاں
نیندراں نیں اُڈیاں
اتوں اخبار دیاں خبراں چ آیا اے
پڑھ کے تے اکھاں وِچ ہڑھ جیہا آیا اے
اِنج کیویں ہویا تیرے ایڈے وڈے شہر وِچ
پیو کِسے سٹ دِتا بچیاں نوں نہر وِچ
مر کے سی جہڑے ربا تیرے تک اپڑے
سنیائے منگدے سی عید لئی کپڑے
لکھیا سی بچیاں دا پیو مزدور سی
ایس کانی ونڈ ہتھوں بڑا مجبور سی
خورے اوہنے کِسراں سی پیر اِنج پُٹیا
کالجے نوں کڈھ کے تے نہر وِچ سُٹیا
جائو اسلام آباد کرو اعلان لوکو
کتے نئیں ڈب کے تے مرے انسان لوکو
نِکی جِنی رات اے تے
سوچاں آن وڈیاں
پت لئی گڈیاں
تے دھی لئی گُڈیاں
نیندراں نے اڈیاں!
