مناجات
رانا اکرم شاد
کِنہوں اپنا حال سناواں
دل دے کنہوں پھٹ وکھاواں
دنیا اگے بھیت نہ کھولاں
کلا لُک لُک نِیر وگاواں
بُلہاں اتے ترلے آقا
سینہ ساڑن بلدیاں ہاواں
چُماں آ کے حجر اسود
دُوری دا پندھ کِنج مکاواں
اُجڑی جھوک ہے میرے دل دی
تیرے قدمیں آن وساواں
سڑدے بلدے جگ دے اُتے
تِیری رحمت کِیتیاں چھاواں
جو تیرے محبوب دے عاشق
میں اُنہاں توں صدقے جاواں
کرم کریما کر اکرم تے
ہو جاون مقبول دعاواں
