جال سیاستداناں دا
بابا نجمی
دساں کیہ میں حال سیاستداناں دا
قبلہ کعبہ مال سیاستداناں دا
جلسے وچ جلوساں کدے وی ہویا نہیں
مریا ہووے بال سیاستداناں دا
نٹھو لوکو خیر منائیے دھرتی دی
آیا فیر بھچال سیاستداناں دا
ساڈے مونہہ تے آکھن سانوں آن غریب
ویکھو یار کمال سیاستداناں دا
اپڑ جاون جس دن وچ اسمبلی دے
تکنا فیر جلال سیاستداناں دا
اسیں آں بھولے پنچھی پھسناں فیر اساں
لگا فیر اے جال سیاستداناں دا
ہن تے پا لئو جپھیاں کل پرچھاواں وی
کھیہ نہیں سکدا نال سیاستداناں دا
ساڈی فیر چنگیر نے خالی رہنا ایں
بھر جانا ایں تھال سیاستداناں دا
جنا تیک الیکشن بابا ہوندا نہیں
رشتہ ساڈے نال سیاستداناں دا
