غزل

مجاہداقبال مجاہد

غصے غصے نیں سرکار اج خیر نہیں لگدی
کھڑکن ٹٹے دل دے تار اج خیر نہیں لگدی
خورے کنہے لٹے جانا اج میرے وانگوں
سوہنیاں کیتا ہار شنگار اج خیر نہیں لگدی
پنکھ پکھیرو ڈھور ڈنگر کیوں نسے جاون
ویکھاں اٹھ اٹھ پباں بھار اج خیر نہیں لگدی
خورے مینوں تکیا اے اج کہڑی نظرے
جُثہ ہو گیا ٹھنڈا ٹھار اج خیر نہیں لگدی
چھاواں چُبھدیاں دھپاں وانگوں خورے کاہنوں
وڈھ وڈھ کھائے پئی بہار اج خیر نہیں لگدی
کٹھیاں جین مرن دا آکھن والے
چھڈ گئے نیں ادھ وچکار اج خیر نہیں لگدی
جاندا جاندا ایہہ کیہ مینوں کہہ گیا سوہنا
کون مجاہد کہڑا پیار اج خیر نہیں لگدی