اک پرانا خواب
خالدحسین تھتھال
کدے کدے اک خواب پرانا
اکھیاں اگے آ جاندا اے
جس نوں ویکھ کے
اپنا آپ وی بھوں جاندا اے
ایہہ دنیاوی بھوندی جاپے
سمجھ نہ آوے
خواب اے یا کوئی روگ اولاّ
یا خبرے کوئی بھلی وسری ان پکری
کوئی سدھر ہووے
تے سوچاں دی کسے سندر ماڑی
دی نینہاں وچ دبی ہووے
تے جد ایہہ اکڑینواں لیندی
میری ماڑی دیہہ کنب جاندی
یا فیر ایہہ ان ڈٹھا سُفنا
یا کوئی ان ڈٹھی ہوند
جس دا ایر جیہا کوئی آوے
اک دن خبرے
تعبیراں دا چولا پاکے
اکھیاں اگے ساہواں نیڑے
سگواں ہو کے آن کھلووے
اپنا اصلی روپ دکھائے
