اجے ڈُلھے بیراں دا کجھ نہیں وگڑیا

لكهت:ایثار رانا

سانوں تے پتہ ای نہیں سی کہ فواد چوہدری پی ٹی آئی دے ٹام کروز نیں جہناں دے ذمے ناراضگی دی سب توں اچی چوٹی تے بیٹھے ترین گروپ نوں منان دا مشن امپاسبل سی۔ اوہناں نوں جس خاموشی نال ترین گروپ دے سامنے من جا من جا بالم من جا نہ ٹھکرا میرا پیار گایا اوہدی ہیپی اینڈنگ صوبائی وزیر نعمان لنگڑیال دے گھر ہو گئی۔ پر سنتاسنگھ دا خیال اے کہ ایہ صلح فیملی کورٹ ولوں میاں بیوی نوں اکٹھے رہن دی اوس ہدایت ورگی اے جہدے وچ طلاق تے نہیں ہوندی پر اوہ اک چھت تھلے وی میاں بیوی وانگوں نہیں رہندے۔ ٹیچر نے کہیا کہ خودمختار نوں جملے وچ استعمال کرو؟ سنتاسنگھ نے لکھیا ندیم افضل چن نے خودمختار نوں فون کرکے کہیا کہ وڑ جانیا گھر وچ بیٹھ۔ ہن مختاریا گھر وچ وڑ تے گیا اے پر کدوں تک بیٹھے گا کجھ نہیں کہیا جا سکدا کیوں جے جتھے اگ ہووے گی گھیو پگھرے گا۔ جتھے دولت ہووے گی اوتھے تھوڑی بہت ہتھ چلاکی وی ہووے گی تے جتھے ہتھ چلاکی ہووے گی اوتھے نیب دی ہوائی فائرنگ وی ضرور ہووے گی۔
وزیراعظم عمران خان ٹھیک کہندے نیں کہ نیب نے 23 ورھیاں وچ ککھ نہیں کیتا تے کپتان جی ہن کیہ کریئے ساڈا انصاف دا نظام قوم دے مثانے وانگوں واہوا کمزور اے۔ ہن کس طرح انصاف دے گٹے گوڈیاں دی مالش کریئے ایہنوں طاقت دے کہڑے ٹیکے لائیے کہ اوہ طاقتور دے سامنے کھڑا ہو سکے۔ چلو نیب شیب نال میڈیا وچ تھوڑا رولا رپا تے رہندا اے۔ سزا ہووے نہ ہووے بندہ دھریکیا ایناں جاندا اے کہ اوہدے گٹے گوڈے چھل چھُل جاندے نیں۔ فواد چوہدری اگے اک درخواست اے کہ اوہ روٹھا منائی دے سوسالہ سنیاسی باوا نیں جدوں ویلا آوے گا تے ایہ رُسیا گروپ کدی خان صاحب دے نال نہیں کھڑا ہووے گا۔ اجے ڈلھے بیراں دا کجھ نہیں وگڑیا ہن وی ویلا جے پی ٹی آئی دے رُسے کارکناں نوں وی منا لوو‘ ایہ کارکن پیپلزپارٹی نال رُسے تے اوہدے پلے ککھ نہیں بچیا۔
میں تے اپنیاں اکھاں نال آرپار دے نعرے نوں دو واری نکامی دے گندے نالے وچ غوطے کھاندے ویکھیا اے اک واری مریم بی بی دے ہتھوں تے ہن سجرا شاہ محمود قریشی دے۔ فواد چوہدری نے اجہی وچ لت اڑائی کہ پی ٹی آئی دے وچکار شاہ محمود قریشی دی خواہش دے مطابق لکیر قائم نہ ہو سکی پر میں قریشی صاحب دی معصوم خواہش جدوں ہولی جہی لینا میرا ناں تے فیر اوہنوں تھاں مر جاندے ویکھن دے باوجود اوہناں نوں سلام پیش کرنا واں۔ اوہناں نے جس طرح سی این این دی اینکر دی خاموش چیکاں کڈھوائیاں کمال کر دتا۔ اوس اینکر دا وَس نہیں سی چل رہیا نہیںتے اوہ قریشی صاحب نوں لائیو دندی وڈھ لیندی۔ حالاں کہ اوس اینکر دی خوبصورتی ویکھ کے ساڈا دل پسیجیا پر فیر سانوں یاد آیا کہ اسرائیل نے کس طرح نہتے فلسطینیاں تے بمباں دی بارش کیتی۔ کئی معصوم بچے عید دے دیہاڑے اپنے ماں باپ نوں یاد کرکے فریاد کردے رہے ایہ پھٹ ہمیشہ ہرے رہن گے۔ ایہ لہو ہمیشہ رسدا رہوے گا۔ قریشی صاحب نوں ساڈا دوہاں ہتھاں نال سلام‘ اوہناں نے بڑے ڈپلومیٹک انداز وچ لوٹے وچ دریا بند کر دتا۔ ایہدے وچ کوئی شک نہیں کہ دنیا دا 80فیصد میڈیا یہودیاں دے قبضے وچ اے۔ اوہ عراق‘ شام‘ افغانستان‘ ایران‘ لیبیا‘ مصر جتھے چاہندے نیں مسلماناں نوں دہشت گرد ثابت کردے نیں تے فیر اوہناں دے ای لہو نال ہولی کھیڈدے نیں تے فیر اوس لہو نوں دہشت گرداں دا لہو ثابت کردے نیں۔ شاہ صاحب نے بڑے نپے تلے انداز وچ سی این این دے منہ تے سچائی دی چپیڑ کرائی۔ پر میرا اک سوال فلسطینی بھراواں اگے وی اے کہ اوہ کہڑی گل دا جشن منا رہے سن؟ جنیاں لاشاں اوہناں نے چکیاں ہونا تے ایہ چاہیدا سی کہ اوہ اوس دن اوہناں دی یاد مناندے۔ بہرحال میں اپنی حیاتی وچ مسلم حکمراناں توں ودھ بے حس تے فلسطینیاں توں ودھ بہادر لوک نہیں ویکھے۔
مینوں تے لگدا اے اک چوانی دے مقناطیس نے بل گیٹس دے ارباں کھرباں دے ویکسین ڈرامے دا پیپا کھڑکا دتا اے ایہ اوہو مقناطیس اے جو ویڈیوز وچ عین ویکسی نیشن دے مقام تے ٹچ کرکے چمڑ جاندا اے۔ ہن سمجھ آئی بل گیٹس اوس ویکسین راہیں دنیا دی اعلیٰ ترین‘ اوصاف والی پاکستانی قوم دا ڈی این اے چینج کرنا چاہندا اے اوہ چاہندا اے کہ اسیں وی باقی دنیا وانگوں ددھ وچ کیمیکل‘ مرچاں وچ اٹاں دا برادہ‘ گھیو وچ گریس‘ ادھوانیاں وچ مٹھے لال رنگ دے ٹیکے لان تے دونمبر گوشت کھان دیاں شیواں ویچن لگ جائیے۔ اوہ چاہندا اے کہ اسیں بطور قوم جو سچ بولنے آں انسان دا احترام‘ لالچ تے دھوکے توں نفرت کرنے آں اوہ چھڈ کے بے ایمان بن جائیے توبہ توبہ ساڈے ورگی مہذب‘ بااخلاق‘ باکردار قوم خلاف اینی بھیانک سازش۔ سنتاسنگھ نے فقیر نوں کہیا شرم کر بھیک منگنا ایں‘ جا کوئی کم کر‘ اوہ بولیا ایہ کم ای تے ہے‘ سنتابولیا ایہ وی کوئی کم اے‘ فقیر بولیا جے نہیں تے توں دو گھنٹے ایہہ کم کرکے وکھا۔ دنیا دے سب توں محنتی‘ جفاکش حلال کھان والی قوم دے خلاف بالآخر بل گیٹس دی سازش بے نقاب ہو ای گئی۔ اوہ چاہندا سی کہ ایس ویکسین نال ساڈی خودی کھوہ لوے‘ تے اسیں اقوام عالم توں قرض منگیے۔ ایٹم بمب‘ بجلی تے بجلی دا بلب‘ موبائل‘ کمپیوٹر‘ موٹرگڈیاں‘ جہاز‘ خلائی ٹیکنالوجی ایجاد کرن والی کائنات دے راز بے نقاب کرن والی قوم توں اوس ویکسی نیشن راہیں ساریاں صلاحیتاں کھوہ لوے۔ میں ٹوبہ ٹیک س نگھ دے کالومراثی‘ جڑانوالہ دے شگوقصائی‘ لہور دے منشاسوئچ تے ایس طرح دے سارے ملک دے عظیم محققین دا مشکور آں جہناں نے اک مقناطیس راہیں پاکستانی قوم خلاف اینی وڈی سازش بے نقاب کر دتی۔ جاہل گیٹس تیرا انجام وی بھاٹی گیٹ ورگا ہووے جو ہن نہ بند ہوندا اے نہ کھلدا اے۔(بشکریہ روزنامہ پاکستان)