بالکا

عارف شاہ پروہنا

میں بالکا وارث شاہ دا تے وارث میرا پیر
شعر آکھن دا ول میں سکھیا پڑھ کے اوہدی ہیر
اوہدے اک اک اکھر وچوں آوے نظر پنجاب
سینے دے نال لائی رکھاں میں تے اوہدی کتاب
آپے بھابی بن کے اوہنے مارے رانجھے نوں طعنے
آپے تخت ہزارہ چھڈ کے ٹر پیا دیس بیگانے
آپے بھائیاں بھابیاں ولوں رسیا ویر مناوے
دنیا چاری رکھن دے لئی ترلے منتاں پاوے
آپے اپنی جوہ نوں چھڈ کے اپڑیا جھنگ سیال
آپے ہیر تے آپے رانجھا کردا جائے کمال
آپے چوچک آپے کیدو آپے سیرا کھیڑا
بیلے وانگوں کھلا سجنوں اوہدے دل دا ویہڑا
کدے اوہ قاضی بن کے آپے ہیر دا پڑھے نکاح
کدی پتن تے بیٹھا بن کے آپے ای لڈن ملاح
آپے ٹلے تے گرو بن بیٹھا آپ بن دلا چیلا
آپے بنیا چاک مجھیں دا آپے چھڈیا بیلا
آپے کنیں مندراں پائیں آپے لیا اے جوگ
سچ سیانے کہ گئے عارف بھیڑا عشق دا روگ