غزل
کلیم شہزاد
سجناں دی سجنائی ویکھی
تھاں تھاں تے چترائی ویکھی
چن دے بوہے اُتے جھلی
رات وی رد کے آئی ویکھی
میں کل راتیں سفنے دے وچ
مورت وی گھبرائی ویکھی
ساہواں والی دولت میں تے
اس در تے ورتائی ویکھی
بلھاں اُتے چپ دے جندرے
اوہ وی اکھ پتھرائی ویکھی
شبنم ورگے لہجے والیاں
ساہ ساہ اگ وی لائی ویکھی
ایویں مونہہ ملاحظے ہندے
کس نے سانجھ نبھائی ویکھی
جس کلیم سی ٹویا کھٹیا
اوہدے اگے کھائی ویکھی
