غزل
امین خیال
ایتھے سب دا خالی چھاپا کاہدے جشن منائیے
توں ای دس خاں سوہنیا بابا کاہدے جشن منائیے
چٹی چمڑی والے صاحب ہیٹھاں جوئی رکھیا
کالے صاحب دا ہن وی دابا کاہدے جشن منائیے
اک تے لہو پسینہ کر کے رو دھو ڈنگ ٹپاندے
اک ویہلڑ پے کھاندے کھابا کاہدے جشن منائیے
ٹٹے نہر تے پیچن سارے رقبے وڈے وڈے
چھوٹے بھر دے رہن خرابا کاہدے جشن منائیے
بھرے کنالے چھانے پھر وی ساون ماہ نہ ٹریا
ہن دِھر دِھر دے ہتھ رکابا کاہدے جشن منائیے
روون لہو جنھاں تے راوی واسیاں نوں کیہ بنیاں
رڑھیا پیار چناب دوآبا کاہدے جشن منائیے
یار خیالؔ انعام تے تغمے اگل ہتھ لے جاون
ساڈے لئی بس سکی شابا کاہدے جشن منائیے
