عشق
انجم قریشی
اَج توں رات دی بکل کرکے اپنے ساہ پھرولیں
ہر اِک ساہ نوں چکھدا جاویں مونہوں کجھ نہ بولیں
پباں بھار کھلوتے تارے چن دی راہ اُڈیکن
اکھّاں وی بند باری بیبا اندروار نوں کھولیں
ہوند دا کوئی بھیدی ناہیں کنج فیر کریں نتارا
اپنے آپ دے نال تے مک لے متھ کے نہ توں ڈولیں
عشاء توں فجریں واہی بیجی ہو ہو وتر لایا
کیہڑے کاسے پھڑ کے تے توں کیہڑے پھل پھل گھولیں
اوکھے ویلے اوکھا نہ پے تر جائے گی ایہہ بیڑی
عشق دی کھنڈ نوں بھورا بھورا ہجر سمندر گھولیں
گھنگھرو پیروں لاہ کے نچیں لوں لوں نوں چھنکاویں
جے چاویں توں یار نبھانا دل نوں رج کے رولیں
ہر جُسّہ اِک آڑھت منڈی ٹھگی لان نوں بیٹھا
اندروں باہروں اِک جیہا ہوکے دل نوں تکڑی تولیں
لہو دی دھار اے ریشم ڈوری نت پے جاندے گنجھل
اندروں اندریں گنڈھا پئیاں اِک اِک کرکے کھولیں
کل لکائی لبھن آئی کسے نہ کم دا میلہ
اپنے نال جے متھا لاویں سولیں جھولا جھولیں
