غزل

بابا نجمی

مونہہ چوں بول کدے نہ کڈھیے اسیں بغاوت والے
دین مساوی حق جے سانوں لوک صدارت والے
چڑھدے ڈُبدے سورج روکے موت کسے نہ روکی
چھڈ دے آل دوالے رکھنے لوک حفاظت والے
دے شاواشے سانوں ربّا تیرا بھار ونڈایا اے
اساں وی کجھ سامان بنا لَے ویکھ قیامت والے
سیرت ویکھ کے دنگ رہ جانا میری صورت اُتے
تاڑی مار کے جہڑے ہسے سوہنی صورت والے
کہڑا خوف اے جہڑا تینوں سچ نہیں بولن دیندا
توں تے سولی چڑھ کے بولے بول صداقت والے
لیا بچا اے جرنیلاں توں پا کے رولا رپّا
بیڑا کدھرے لے نہ ڈبن لوک سیاست والے
شہر میرے دا اک وی چلھا رہ نہیں سکدا ٹھنڈا
ذرا جیہا ہتھ ڈھلا چھڈن بابا دولت والے