کجھ ڈاکٹر طارق عزیز بارے

لكهت:تنویر ظہور

لکھاری‘ محقق‘ نقاد‘ شاعر‘ ڈرامہ نگار تے استاد ڈاکٹر طارق عزیز پچھلے مہینے 20مئی نوں کرونا توں ہار من گئے۔ اوہناں لتاں توں معذور ہون دے باوجود ہمت تے حوصلے نال اک فعال تے پروقار حیاتی گزاری۔ پیدائش دے بعد پولیو دا شکار ہوئے تے موت کرونا نال ہوئی۔ طارق عزیز دس جنوری 1954ء نوں جہلم وچ پیدا ہوئے۔ پرائمری دا امتحان ایم سی پرائمری سکول مشن محلہ نمبر تن جہلم توں تے میٹرک دا امتحان گورنمنٹ ہائی سکول جہلم توں پاس کیتا۔
1978ء وچ ایم اے اردو تے 1986ء وچ پی ایچ ڈی دی ڈگری پنجاب یونیورسٹی توں حاصل کیتی۔ پی ایچ ڈی دے مقالے دا عنوان سی ’’اردو رسم الخط اور ٹائپ‘‘ شروع وچ آپ ڈائریکٹوریٹ آف ایجوکیشن (کالجز) وچ بطور اسسٹنٹ ڈائریکٹر خدمات نبھاندے رہے۔ اوہناں دیہاڑیاں آپ نے موٹرسائیکل خریدی تے اک ڈرائیور رکھ لیا۔ ایتھے اوہناں نال میری کجھ ملاقاتاں رہیاں۔ اوہناں دے والد عبدالعزیز ریلوے وچ ملازم سن۔ اوہناں دی جہلم توں لہور ٹرانسفر ہوئی تے شازو لیبارٹریز دے سامنے ریلوے کالونی وچ کوارٹر الاٹ ہویا۔ ایس کوارٹر وچ اوہناں نال ملاقاتاں جاری رہیاں۔ اوہ شوقیہ فوٹو گرافر وی سن۔ گھر وچ ای سٹوڈیو بنایا ہویا سی۔ میری اوہناں نے کجھ فوٹواں بنائیاں۔ چہرے نوں زیادہ فوکس کردے سن۔
1985ء وچ طارق عزیز نے گورنمنٹ ایف سی کالج وچ اردو دے پروفیسر تے 2003ء تک ایسے کالج وچ صدر شعبہ اردو خدمات نبھائیاں۔ 2003ء وچ گورنمنٹ سائنس کالج وحدت روڈ ٹرانسفر ہو گئی۔ 2008ء وچ پرنسپل دے عہدے تک اپڑے۔ طارق عزیز نوں اک واری میں آکھیا طارق عزیز (نیلام گھر فیم) زیادہ مشہور نیں۔ تسیں ناں بدل لوو یاں ناں دے نال جہلمی لا لوو۔ طارق عزیز جہلمی اوہناں دیہاڑیاں اوہ پی ایچ ڈی دا مقالہ لکھ رہے سن۔ مینوں کہیا کجھ مہینے انتظار کرو‘ جدوں مینوں پی ایچ ڈی دی ڈگری مل جاوے گی تے میں ناں توں پہلاں ڈاکٹر لکھنا شروع کر دیواں گا۔ فرق واضح ہو جاوے گا۔ کیوں جے نیلام گھر والے طارق عزیز تے ڈاکٹر نہیں پر اوہناں نے ویاہ اک ڈاکٹر نال کیتا اوہ وی میڈیکل ڈاکٹر نال۔
ڈاکٹر طارق عزیز نے پی ٹی وی تے دوجے چینلاں لئی ڈرامے لکھے۔ گیسٹ ہائوس‘ آنکھ اوجھل‘ علی بابا ایہناں دے مشہور ڈرامے نیں۔ کجھ ڈرامے ڈائریکٹ وی کیتے۔ یوم اقبال‘ یوم مزدور تے یوم دفاع دے سلسلے وچ خصوصی کھیل وی لکھے۔ اردو توں علاوہ پنجابی زبان وچ وی لکھدے سن۔ ’’ترٹھ‘‘ اوہناں دا طویل پنجابی ڈرامہ اے۔ ڈاکٹر طارق عزیز نے سماجی خدمات وچ وی حصہ لیا۔ کجھ سماجی تے رفاہی تنظیماں دے عہدیدار سن۔ اوہناں نے کار خریدی سی جہڑی سپیشل بندیاں لئی خصوصی طور تے تیار کیتی جاندی اے۔ اوہدا سارا سسٹم ہتھ وچ ہوندا اے۔ اوہناں نال میری آخری ملاقات طارق بلوچ صحرائی دے افسانوی مجموعے ’’گونگے کا خواب‘‘ دی تعارفی تقریب وچ ہوئی۔ ایہ تقریب اشفاق احمد‘ بانو قدسیہ دے گھر اثیراحمد خان نے منعقد کیتی سی۔ گونگے کا خواب دا دیباچہ ڈاکٹر طارق عزیز نے لکھیا۔ لتاں توں معذوری دے حوالے نال جدوں میں اوہناں توں پچھیا تے کہن لگے۔ ایس داستان وچ کیہ رکھیا اے۔ بس اک ویلا سی جو لنگھ گیا۔ میں جدوں ہوش سانبھیا تے اپنے آپ نوں ایسے حالت وچ پایا۔ ایہدے وچ پروان چڑھیا‘ تکلیف تے بہرحال پیش آئی پر میں ہمیشہ ایس انداز وچ سوچیا اے کہ ایہناں تکلیفاں دی جہڑی نوعیت رہی اے اوہ کسے نوں وی پیش آ سکدی اے ایس لئی دکھ کدی نہیں ہیوا۔
ڈاکٹر طارق عزیز دی اک دھی تے اک پُتر اے۔ دوویں لندن وچ رہندے نیں۔ اوہناں دی بیوی وی پروفیسر نیں جو ہن ریٹائر ہو چکیاں نیں۔ سرکاری ملازمت توں ریٹائرمنٹ دے بعد ڈاکٹر طارق عزیز لیڈز یونیورسٹی نال وابستہ ہو گئے۔ ایتھے اوہ چیئرمین شعبہ اردو تے ڈین فیکلٹی آف آرٹس رہے۔ آخر وچ اوہناں دے دو شعر:
تو نے جو بھی درد دیا ہے
میں نے کب انکار کیا ہے
میں نے تم کو کیا سمجھا تھا
میں نے تم کو کیا پایا ہے