حرام حلال دی کرو پچھان

عاصم بخاری

کھاوے نت حرام حلال نوں بن کے اک وباء
رزق حلال اے عین عبادت خود توں ایہہ سمجھا
جھوٹ دی نینہہ تے کرن تجارت ایہہ اج دے تجار
جھوٹ دی بیڑی ڈب جاندی اے جا کے ادھ وچکار
نام تیرے دی تسبیح پڑھ کے دانے دین گرا
رزق نوں کرن ذخیرہ ایتھے بن کے لوگ خدا
میسنی شکل بنا کے ایویں منگدے پھرن دعا
آکھن رباّ ساڈی روزی وچ توں ہی برکت پا
رزق ایہناں دا دنیا اُتے رباّ خوب ودھاویں
ماڑیاں کولوں سب کجھ لے کے اوہناں نوں پکڑاویں
ساڈے مال تے پلدے رہندے نیں ایہناں دے بچے
فیر وی جگ تے اسیں ای جھوٹے ایہہ ہمیش توں سچے
رزق حلال اچ برکت ہوندی ایہہ تیرا فرمان
حق حلال نوں وادھا جاسی ایہو اگلے جہان
ڈاڈھا اوکھا اج کمانا ایتھے رزق حلال
جرم دی راہ تے ٹر کے ایتھے روٹی کھان سوکھاں
جرم گناہ دا رستہ جے کر انج رہیا
ہور حرام ودھے گا جگ تے نالے جھوٹھ دغا
وچ تجارت لیندے نیں ایہہ پاک نبیؐ دا ناں
پاک تجارت کرن دے سارے دسے راز اوہناں
ہے کوئی جہڑا مال اپنے دے پہلوں عیب گناوے
ویچ کے کانی اونٹنی فیر اوہدے پچھے جاوے
پاک تجارت کرن دے سوہنا سوہنے راز سکھاوے
کفر دے گھر اچ بہہ کے وی اوہؐ صادق ہی اخواوے