’’چیرہ دستیاں‘‘ دی شکایت

لكهت:ابرار ندیم

استاد محترم تے میں پچھلے پنج چھ ورھیاں توں اکو اخبار وچ کم کرنے آں‘ آپ دا شمار ملک دے اجہے نڈر‘ بہادر تے ایماندار صحافیاں وچ ہوندا اے جہناں نے کسے دبائو‘ لالچ تے مصلحت دے بناں اپنے کم نوں ہمیشہ فرض سمجھ کے پورا کیتا اے۔ سچی گل ایہہ وے کہ میں صحافت دا پیشہ اختیار ای آپ توں متاثر ہو کے کیتا اے تے میری خوش قسمتی اے کہ مینوں اپنے کیریئر دے شروع وچ ای اوہناں دی شکل وچ اک اجہے مہربان‘ ہمدرد تے شفیق استاد دی رہنمائی مل گئی اے جہناں دے منفرد اسلوب تے حق گوئی دا اک جہان معترف اے۔ میری کوشش ہوندی اے کہ مینوں جدوں تے جتھے موقع ملے میں آپ دیاں لکھتاں تے آپ دی موجودگی توں کجھ نہ کجھ سکھدا رہواں۔ پچھلے دیہاڑے میں اپنے کم توں ویہلا ہو کے حسب معمول اوہناں دی خدمت وچ بیٹھا سی کہ اچانک اوہناں دی نظر میری بانہہ تے نمایاں اک پرانے پھٹ دے نشان تے پئی جہنوں ویکھ کے اوہناں نے پچھیا تیری بانہہ تے ایہ پھٹ دا نشان کیوں اے۔ میں اک ٹھنڈی آہ بھردے ہوئے آکھیا سر جی! لڑکپن وچ ایتھے مینوں اک کتے نے وڈھ لیا سی ایہ سن کے اوہ سر ہلاندے ہوئے کہن لگے ضرور توں اوس کتے نال پنگا لیا ہونا ایں ایہدے تے میں شرارت بھرے انداز وچ کہیا سر ایہ گل تسیں اینے یقین نال کیویں کہہ سکدے او ایہ وی تے ممکن اے پنگا کتے نے لیا ہووے میرے جواب تے اوہ ہلکا جیہا مسکرائے تے کہن لگے برخوردار! میں ایہ گل اینے وثوق نال ایس لئی کہہ رہیا واں کیوں جے جدوں دا میں تہانوں جاننا واں میں ہمیشہ ایہ گل نوٹ کیتی اے کہ تسیں جتھے کسے کتے نوں ویکھدے او تہاڈی رگ ظرافت و صحافت دوویں ای بری طرح پھڑکن لگ پیندیاں نیں۔
استاد محترم دے ایس جملے دی ذومعنویت وچ میں بے اختیار ہس پیا تے کہن لگا پر سر جی! ایہ اوہ والا کتا نہیں سی جہناں ول تہاڈا اشارا اے۔ ایہدے تے اوہناں نے ہوں دی اک لمی آواز کڈھی تے کہیا سوال ایہ نہیں کہ تینوں کٹن والا کتا اوہ والا سی یاں ایہ والا‘ میں تے تیری کتیاں نال چھیڑ چھاڑ تے پنگابازی کرن دی اوس عادت دی گل کر رہیا واں جہدے وچ ویلے دے نال نال بے وقوفی دی حد تک شدت آئوندی جا رہی اے۔ میں کہیا سر تہاڈا تجزیہ سوفیصد ٹھیک اے واقعی اوس کتے نال میں آپ پنگا لیا سی حالاں کہ اوس ویلے اوہ اپنے دھیان وچ کدھرے جا رہیا سی۔ اصل وچ مینوں اوہدے تے غصہ سی کہ اوہ آئے دن نہ صرف غریب لوکاں دیاں ککڑیاں کھا کے جاندا سی سگوں اکثر آئوندے جاندے لوکاں نوں وی وڈھ لیندا سی بس ایسے دکھ وچ میں اوس کتے نوں سبق سکھانا چاہندا سی جہدے نتیجے وچ زخمی ہو کے مینوں کوئی دو ہفتے تک ہسپتال وچ زیرعلاج رہنا پیا تے ایس دوران میرے ڈھڈ وچ پورے چوداں ٹیکے وی لگے۔
استاد محترم نے اک واری فیر زیرلب مسکراندے ہوئے پچھیا کہ اوس کتے دا کیہ بنیا؟ میں اوہناں دے سوال میں چھپی شرارت دا مزا لیندے ہوئے کہیا سر جی! اوہ تے میری مدد نوں آن والے لوکاں دے اپڑن توں پہلاں ای اوتھوں نس گیا سی۔ ہن اوہناں کسے تفتیشی پولیس افسر دے انداز وچ پچھیا کیہ تینوں پورا یقین اے کہ اوہ کتا اوہو سی جو بستی والیاں دیاں ککڑیاں کھان دے دے نال نال لوکاں نوں وی وڈھدا سی۔ میں کہیا بالکل سوفیصد اوہو کتا سی‘ میں نہ صرف دو تن واری موقع واردات تے اوہنوں آپ اپنیاں اکھاں نال ویکھیا سی سگوں اوہنوں روکن دی وی کوشش کیتی سی پر اوہ ہر واری موقع واردات توں مال سنے نس گیا۔ ایہ سن کے اوہ کہن لگے فیر وی اک ذمہ داری شہری دی حیثیت نال تینوں ایس طرح قنون نوں ہتھ وچ نہیں سی لینا چاہیدا۔ ایہ گل کردے ہوئے استاد محترم دا لہجہ اجیہا سی کہ مینوں بالکل سمجھ نہیں آئی کہ اوہ مذاق کر رہے یاں سنجیدہ نیں‘ میں اک نظور بغور اوہناں دے چہرے ول تکیا تے پچھیا تے تسیں مینوں دسو کیہ میں اپنیاں اکھاں دے سامنے بستی والیاں دے نال اوس کتے دی غنڈہ گردی تے لٹ مار ویکھ کے وی بے حس تے ڈرپوک لوکاں وانگوں چپ کرکے ایہ سب کجھ برداشت کردا رہندا۔ اوہ کہن لگے بالکل نہیں تینوں چاہیدا سی کہ توں اوس کتے دی شکایت اوہدے مالک اگے کردے۔
میں کہیا سر جی! میں اوہدے مالک اگے وی اوہدیاں چیرہ دستیاں دی شکایت کیتی سی تے اک واری نہیں کئی واری کیتی سی کہ اوہ اپنے کتے نوں ایس طرح کھلا چھڈن دی تھاں اوہنوں پٹہ پا کے رکھے۔ ایہدے تے اوہنے مینوں اپنے کتے دیاں زیادتیاں دی معذرت کرن دے نال اگوں اوہنوں پٹہ پا کے رکھن دا وعدہ وی کیتا سی پر مینوں لگدا اے ایس معاملے وچ یاں تے اوہدا منہ زور کتا اپنے مالک دے کنٹرول وچ نہیں سی یاں اوہ شریف بندہ گل کرکے بھُل جاندا سی۔ ایہ سن کے استاد محترم نے اگے ودھ کے میری بانہہ پھڑی تے اوہدے تے پھٹ دے نشان نوں بغور ویکھن مگروں دوجی بانہہ دا وی چنگی طرح جائزہ لیا جتھے اوسے طرح دے اک دو پرانے پھٹاں دے ہور وی نشان سن اوہناں پھٹاں نوں ویکھ کے اوہناں نے پچھیا ایہ پھٹ وی اوسے کتے دی کارستانی نیں؟۔ میں کہیا جی سر! ایتھے وی اوسے کتے نے وڈھیا سی۔ ایہدے تے اوہناں نے کہیا یقینا ایس واقعے دے بعد کتے نوں سبق ملیا ہووے یاں نہ ملیا ہووے تینوں ضرور ایہ سبق سکھنا چاہیدا سی کہ ہر اوہ بندہ جہنوں کتے پالن دا شوق ہووے پر اوہ اپنے اوہناں کتیاں نوں پٹہ پا کے رکھن دی تھاں اوہنوں لوکاں تے بھوکن تے اوہناں نوں وڈھن لئی کھلا چھڈدیو تے بندہ بالکل شریف نہیں ہو سکدا بھاویں اوہ شریف بنن دی کنی ای اداکاری کیوں نہ کرے کیوں جے کوئی وی کتا بھاویں اوہ کناں ای منہ زور تے خطرناک ہووے اپنے مالک دی مرضی دے بناں نہ تے کسے تے بھوک سکدا اے تے نہ ای کسے نوں وڈھ سکدا اے۔٭