لیکھا
ندیم افضل
کیہ لیکھا کیتا لیکھ نے
اسیں ہو گئے پکھی واس
اسیں عرشوں دھکے کھا لئے
نہ دھرتی سانوں راس
ساڈی روح تے سٹاں وجیاں
ساڈے اڈے ہوش حواس
کیہ لیکھا کیتا لیکھ نے
ساڈا باندر ہتھ نیاں
ایتھے راکھے لٹی جاوندے
پئے اپنے شہر گراں
سانوں اپنے دیس چہ لگدا
اسیں وسدے اوبھڑ تھاں
کیہ لیکھا کیتا لیکھ نے
سانوں گن کے دتے ساہ
ایہ کسراں رل کے وسدے
آگ پانی مٹی واء
جد چارے پاسے موت سی
کیہ جین دا کر دے چا
کیہ لیکھا کیتا لیکھ نے
ہر پاسے گھپ ہنیر
ایتھے لکھاں سورج چڑھ کے
وی کر نہ سکے سویر
اسیں مرنوں پہلے مر گئے
ایتھے جیندے کِنی دیر
بہت شکریہ جی خیر ہووے❤️❤️❤️❤️
بہت شکریہ جی خیر ہووے❤️❤️❤️❤️
فوٹو وی لا چھڈو
سر جی فوٹو وی لا چھڈو مہربانی ہووے گی