امریکہ دی دوستی تے دشمنی

لكهت:مطلوب وڑائچ

امریکہ دے نال کسے دی دشمنی تے چنگی ہو ای نہیں سکدی۔ اوہدے نال دوستی وی چنگی نہیں ہو سکدی جہدے نال کسے دی وی دشمنی ہووے اوہ اوہدے توں محتاط رہندا اے۔ دوستی وچ پر مار کھا سکدا اے امریکہ نے کسے اک دے نال انج نہیں کیتا انج دی اک لمی فہرست بن سکدی اے۔ جنرل نوریگا تے نوازشات دی بارش کیتی اوہنوں پاناما دا صدر تک بنوا دتا پر جدوں اختلاف پیدا ہوئے تے اوہنوں اوہدے ملک توں فوجی کاروائی وچ اغوا کرکے امریکہ لیاندا گیا تے عمرقید دی سزا سنا دتی گئی۔ صدام حسین کدی امریکہ دی نک دا وال سی فیر کیہ ہویا۔ فلپائن دا مارکوس‘ یوگنڈا دا عیدی امین‘ تیونس دے زین العابدین‘ جنرل ضیاء الحق تے جنرل پرویزمشرف ساریاں نوں دوستی دے ناں تے استعمال کیتا تے فیر ٹشو پیپر وانگوں سٹ دتا۔ ذوالفقارعلی بھٹو‘ شاہ فیصل تے کرنل قذافی وی امریکہ دے انتقام دے ڈھائے چڑھ گئے۔ ذوالفقارعلی بھٹو نے جان اک عظیم کاز دی خاطر دتی۔ امریکی وزیر خارجہ ہنری کسنجر نے بھٹو نوں چٹھی لکھی کہ ایٹمی پروگرام بند نہ کیتا تے عبرت دا نشان بنا دیاں گے۔ بھٹو نے اوہ چٹھی پنڈی دے راجہ بازار وچ لوکاں دے سامنے لہرا دتی تے بھٹو نوں پھانسی لگوا دتا۔ جنرل ضیاء نوں امریکہ دوستی تے بڑا مان سی۔ روس نوں تاراج کرن وچ ضیاء الحق نے بڑا کردار ادا کیتا۔ کم نکل جان تے اپنے دو اعلیٰ عہدیداراں نوں وی جنرل ضیاء الحق دے نال موت دی لکیر پار کرا دتی۔
دوستو! ایران دے رضا شاہ پہلوی ایشیا وچ امریکہ دے دست راست سمجھے جاندے سن تے ایران نوں امریکہ دا بااعتماد اتحادی منیا جاندا سی تے فیر کئی ورھیاں تک امریکہ رضا شاہ پہلوی تے ایران نوں اپنے مقصد لئی ورتدا رہیا فیر اک دن سیاہی چوس وانگوں یاں اک ٹشو پیپر وانگوں رضا شاہ پہلوی نوں وچکار منجدھار دے چھڈ دتا گیا تے بیمار رضا شاہ پہلوی نوں تخت و تاج چھڈ کے ایران توں نسنا پیا تے اوہدے نسن دی داستاناں وچ ایہ مستند ترین اے کہ رضا شاہ پہلوی نے امریکہ اگے سیاسی پناہ دی درخواست کیتی جہنوں امریکہ نے رد کر دتا تے وچارے بیمار جلاوطن بادشاہ نوں مصر وچ اپنی حیاتی دے آخری دیہاڑے گزارنے پئے جتھے اوہ بے بسی تے بے کسی وچ جان دی بازی ہار گئے تے اوہناں دے بچے اج وی مشرق وسطیٰ دے ملکاں وچ خوار ہو رہے نیں۔ بھٹو امریکہ تے اپنے ای جنرل دے دھوکھے وچ آ گئے پر ایٹمی پروگرام تے کم جاری رہیا۔ ضیاء الحق نے وی اگے ودھایا تے جنرل ضیاء دا ایہ جرم وی امریکہ نوں انتقام تے مائل کر گیا۔ بھٹو دے حرف انکار نے اوہناں نوں پاکستان دا ہیرو بنا دتا۔ اج عمران خان نے وی ذوالفقارعلی بھٹو وانگوں جرأت اظہار توں کم لیا اے اوہ ٹھیک گل کردے نیں۔ امریکہ نوں ہوائی اڈے دین دے سوال تے دوٹوک انداز وچ کہیا بالکل وی نہیں‘ ایہدے تے امریکہ حیران اے۔ عمران خان دے مخالف جو سیاست نوں دشمنی تک لے گئے نیں ایہدے تے بڑے خوش نیں کہ امریکہ نال عمران خان نے ٹکر لئی اے تے انجام چنگا نہیں ہوندا پر ہن انج نہیں ہون والا۔ امریکہ پہلے ورگا طاقتور رہیا اے نہ دوجے ملک پہلے وانگوں کمزور تے بے بس نیں۔ امریکہ طاقتور ضرور اے پر دنیا وچ خدا نہیں۔ اوہنے وڈے وڈے لوکاں نوں عبرت دا نشان ضرور بنایا پر ساریاں نوں نہیں۔ اوہدا وَس چلدا تے پوری چینی‘ ایرانی تے شمالی کوریا دیاں قیادتاں نوں ختم کرا دیندا۔ مہاتیرمحمد‘ طیب اردگان کدی امریکہ دے سامنے نہیں جھکے۔ عمران خان نوں وی کوئی خطرہ نہیں ہوسکدا اے اوہناں نوں بہرحال محتاط ضرور رہنا اے۔ اپنا خیال رکھنا اے تے آستین دے سپاں توں بچنا اے۔ امریکہ کل تک واحد سپرپاور سی ہن اوہدے مقابلے دی چین تے روس دو سپرپاورز نیں۔ امریکہ دی اج صورتحال وکھری اے۔ پنج جنوری 2021ء نوں ٹرمپ نے وائٹ ہائوس تے قبضے دی کوشش کرکے امریکہ دی قوت نوں لرزا دتا اے۔ ٹرمپ امریکہ دا گورباچوف ثابت ہو سکدا اے۔ امریکہ سوویت یونین دی ڈگر تے چل رہیا اے۔
دوستو! ایہدے وچ کوئی شک نہیں کہ کجھ تجزیہ نگاراں تے ماہرین معاشیات دے نیڑے امریکہ اج وی اک معاشی تے عسکری پاور اے۔ ایہناں دیہاڑیاں جاری کرونا وائرس دے نال لڑدے ہوئے وی امریکہ دے چھ لکھ توں ودھ لوک مارے جا چکے نیں۔ پر ایہ وی حقیقت اے کہ امریکہ اوہ واحد ملک اے جنہے اپنے شہریاں نوں بلامعاوضہ ویکسین دی ڈبل ڈوز دتی اے جد کہ سمال انڈسٹریز بزنس نوں سہارا دین لئی ہر کیس وچ لکھاں ڈالر دی مدد کیتی گئی کیوں جے کرونا دی ناگہانی آفت مگروں اصل وچ پوری دنیا دی معیشت نوں ناقابل تلافی نقصان اپڑیا اے پر ہن ہر ملک اپنے گزشتہ توں پیوستہ تعلقات دی نویں سریوں تجدید چاہندا اے۔ ایس ویلے تسیں دنیا دی سیاست نوں خودغرضی نال تشبیہہ دے سکدے او تے ایہناں معاشی ابتری دے حالات وچ امریکہ عالمی سیاست وچ اپنے آپ نوں اکلا محسوس کرن لگ پیا اے۔ دوجے پاسے ماضی قریب دی سپرپاور روس فیر توں اپنے پیراں تے کھڑا ہو گیا اے تے یقینا اوہدا ساتھ ایس ویلے دی واحد معاشی طاقت چین دے رہیا اے۔ چین نے حالیہ دیہاڑیاں خلاء وچ اپنا خلائی سٹیشن قائم کیتا اے ایہ امریکہ دے بعد خلاء وچ دوجا قائم ہون والا خلائی اڈا اے تے چین نے پوری دنیا وچ ایہ واضح پیغام گھل دتا اے کہ مشن وینس دے مکمل حقوق دے اسیں ذمے وار آں۔ ایہناں حالات وچ امریکہ دے اندر دے سیاسی مسئلے وی عروج تے نیں۔٭٭