نعت رسول ؐ مقبول
عبدالحمید نظامی
اک رستہ نواں وکھا چھڈیا پاک نعلیناں تیریاں نیں
بس نعت کہن تے لا چھڈیا پاک نعلیناں تیریاں نیں
لاہ دتے گیت غزل دے رنگ میرے دل توں ہولی ہولی
فیر اپنا رنگ چڑھا چھڈیا پاک نعلیناں تیریاں نیں
اک واری منگیا جس نے وی صدقہ تیریاں پیراں دا
اوہدا وگڑیا کاج بنا چھڈیا پاک نعلیناں تیریاں نیں
اعجاز ایہہ تیریاں نعتاں دا ملیا اے کناں پیارا
مرے عشقے نوں چمکا چھڈیا پاک نعلیناں تیریاں نیں
ایہہ سچ نظامیؔ جس نے وی سینے دے نال لائے نیں
کر اوہدا حق ادا چھڈیا پاک نعلیناں تیریاں نیں
