دل دیا محرماں
سلیم نجمی
وے میرے دل دیا محرماں
مینوں تیری نِت اڈیک
پئے اپنے گلاں کردے
تیرے طعنے دین شریک
وے میرے دل دیا محرماں
دس کاہدے مینوں سکھ
نِت اکھیاں نوں رہندی اے
دید تیری دی بھکھ
وے میرے دل دیا محرماں
آ بہہ جا میرے کول
تمے ورگے جیون وچ
پیار دی مِشری گھول
وے میرے دل دیا محرماں
جد آجائے تیرا فون
سبھے دکھ ہجر دے بھلدے
جھٹ جاندا مِل سکون
وے میرے دل دیا محرماں
پئے دل نوں اگاں لان
جد سرخی پوڈر کجلے
کسے دے نظری آن
وے میرے دل دیا محرماں
مُکی جوبن والی دَکھ
چھڈ پردیس دی نوکری
تینوں ترلے پاواں لکھ
وے میرے دل دیا محرماں
جاندے یاد دے خنجر چل
کرے کلولاں چاننی
جد ویکھاں چن دے ول
وے میرے دل دیا محرماں
دل منگدا وصل دی چس
کدوں مڑیں گا نجمی
مینوں پکیاں تریکاں دس
