نعت رسول ؐپاک

عبدالحمید نظامی

سوہنے انگلی نال بلایا سورج پچھلے پیریں
فورن پچھے پرت کے آیا سورج پچھلے پیریں
پاک علی دے زانواں اُتے آقا کملی والے
آرام سی جد فرمایا سورج پچھلے پیریں
عصر نماز قضا جد ہوئی سرکار اشارہ کیتا
لیکے ویلا دیگر آیا سورج پچھلے پیریں
شکر اے مولا پاک نبی نے مینوں وی جے کدھرے
اپنا کوئی حکم سنایا سورج پچھلے پیریں
کتے تاریخ نہ لبھے گی کتے مثال نہ کوئی
کدے وی پلٹ کے انج نہ آیا سورج پچھلے پیریں
توڑ کے چن نوں جوڑیا پتھراں کلمہ پڑھیا
ایہ وی معجزہ نبی وکھایا سورج پچھلے پیریں
ایہہ تے بس اعجاز اے سانوں اسیں نظامی امتیؔ
جہدے کہن تے اڈدا آیا سورج پچھلے پیریں