حمد باری تعالیٰ
کرم علی کیفی
شہ رگ توں وی توں ایں نیڑے مالک کُل جہاناں دے
تیرے دم نال وسن ویہڑے مالک کُل اسماناں دے
توں اک گورکھ دھندا مولا جے لبھیے تے لبھیں نہ
لبھ جاناں ایں جیکر پڑھیے ورقے پھول قرآناں دے
توں تاں پتھر دے وچ مولا روزی دیویں کیڑے نوں
واری تیری رحمت توں میں صدقے تیریاں شاناں دے
میری اس دھرتی دے اُتے کردے رحمت رب سائیں
جہڑے ایہدے ویری ہوئے مان تروڑ شیطاناں دے
بے عقلی تے غفلت والے جندر دل تے وجے نیں
کیفی دی عرضوئی سن لے بوہے کھول ایماناں دے
