غزل

حسین شاد

میں سنیا اج اکو جیہاں حسن تیرے دیاں ونڈاں نیں
جثہ ساڑن والیاں آئیاں کیہو جیہاں ٹھنڈاں نیں
چائیں چائیں ہن تے لوکی موت خریدی جاندے نیں
زہراں وکن کھڈونیاں روپیں اُتے لائیاں کھنڈاں نیں
سمجھن والے سمجھی جاندے تیرے دل دیاں گلاں نوں
ہوٹھاں اُتے چپ دے پہرے اکھاں پاندیاں ڈنڈاں نیں
تیری ن فرت دنیا اندر مینوں کر مشہور گئی
تیرے ایس احسان دیاں میں چائیاں ہوئیاں پنڈاں نیں
چڑھدے سورج دا مُکھ لالو لال وکھالی دیندا اے
گھپ ہنیرے ایہدے منہ تے خورے لائیاں چنڈاں نیں
اکو واری شعر سنا کے شادؔ نے توبہ کر لئی اے
سنگت وچ سیانیاں کولوں کھادیاں ایسیاں پھنڈاں نیں