کجھ اپنے بارے وچ

شفقت اللہ مشتاق

اک واری کجھ صحافی دوست میرے کول تشریف لیائے تے کہن لگے کہ تسیں کدی اپنے بارے وی کجھ لکھو۔ مینوں آئیڈیا بڑا چنگا لگا ایس توں پہلاں کہ لوک میرے بارے لکھنا شروع کر دین تے میرا کچا چٹھا کھل جاوے آپ ای اپنے بارے لکھن وچ کیہ حرج اے۔ فیر اپنے آپ ای اک بیانیہ بنا دتا جاوے۔ بیانیے کہڑا ہتھوڑیاں نال بن دے نیں ایہ آپ ای بن دے جڑدے رہندے نیں لوکاں نوں دس دینا چاہیدا اے کہ اسیں بڑے ای چنگے لوک آں آستیناں وچ سپ رکھنے آں انج دل وچ وی گل رکھنے آں موقع محل ویکھ کے منہ ملاحظہ وی رکھنے آں۔ کدی کدی اپنے ورگے منہ زوراں نال ساڈی منہ ماری وی ہو جاندی اے تے موقع دی مناسبت نال منہ بند کرنا وی خوب جاننے آں تے کدی کدی تے اسیں منہ وکھان دے قابل وی نہیں رہندے۔
ایہ اوہ گلاں نیں جو ایس بیانیے دا وی تیاپانچہ کر دین گئیاں تے کیہ ہویا ودھ توں ودھ بیانیہ ای بدل جاوے گا۔ لوکاں دی سوچ وچ آکڑ اے کجھ پہلے نوں منن گے تے کجھ بعد دے حق وچ دلیلاں دین گے تے ایسے کشمکش وچ گل رولے گولے وچ پے جاوے گی تے فیر کجھ دیر بعد انج ای کھوہ کھاتے وچ پے جاوے گی۔ انج وی تے اک دن کھاتے کھلنے نیں تے فیر جزا سزا دا عمل وی پورا ہوندا اے سارے لوکاں دے نال کدوں بندہ پورا آ سکدا اے۔ ایس لئی ضروری اے کہ دھوڑ اڑا دتی جاوے تاں جے کجھ دکھائی ای نہ دیوے چیزاں صاف نظر آن نال چنگے بھلے لوکاں دی دھوڑ اڈ جاندی اے تے وڈے وڈے چہریاں توں نقاب اتر جاندے نیں بھلا ہووے کرونا دا جہدی وجہ نال نقاب لاہنا جرم قابل دست اندازی پولیس ہو گیا اے تے نقاب دے بناں بندہ کسے ویلے وی گرفتار ہو سکدا اے۔ کمال اتفاق اے کہ نقاب پوش گرفتاری توں مکمل محفوظ‘ سگوں مامون وی ہو گئے نیں کرونا دے وار تے ڈاکو دے وار وچ بڑا فرق اے۔
انج تے امریکہ تے چین وچکار جنگ دا قوی امکان اے پر قوی ہن بڑا کمزور ہو گیا اے تے ڈرامیاں وچ گھٹ ای نظر آئوندا اے۔ ہن اللہ جان دا اے کہ قوی گھٹ گھٹ نظر آئوندا اے یاں قوی نوں گھٹ ای نظر آئوندا اے۔ ہن شاید قوی قوی ای نہیں رہیا امریکہ تے چین دوویں حالات دی نزاکت پاروں محتاط ہو گئے نیں محتاط رویے ای ویلے دی اہم لوڑ نیں نہیں تے ایٹم بمب تے ہر دو فریق دے کول تیار پیا اے تے کسے ویلے وی شرلی پٹاکیاں دیاں آوازاں سنیاں جا سکدیاں نیں پر نقصان دا اندازہ لانا بڑا اوکھا ہووے گا۔ مشکل کم کرکے ای تے بندہ مشکل وچ پے جاندا اے جیویں امریکہ پاکستان توں اڈے منگ کے مشکل وچ پے گیا اے۔ ہن تے تریجے دے آن دا وی امکان نہیں پہلے ای تن نیں۔ امریکہ‘ پاکستان تے افغانستان‘ میرے وانگوں کسے نوں وی سمجھ نہیں لگ رہی۔ امریکہ پاکستان تے افغانستان جانے تے اوہناں دا کم جانے۔ میں تے اپنی گل کراں گا ایہو میرے صافی د وستاں دا میرے توں تقاضا اے۔ کاش سانوں تقاضے پورے کرنے آ جاندے تے اج اسیں مقروض نہ ہوندے۔ بہرحال میں اپنے بارے لکھن دے تقاضے پورے کرن دی کوشش کراں گا کیوں جے جمہوریت دا دور اے ایس لئی پہلے جمورے ببچیاں توں اپنے بارے رائے لینے آں یکلخت ساریاں نے تابڑتوڑ حملے شروع کر دتے نیں کسے نے کہیا میں میسنا واں کوئی بولیا میں اک شاطر تے چالاک بندہ آں‘ اک دے نیڑے میں گلاں ای گلاں وچ لوکاں نوں موہ لینا واں۔ کوئی مینوں پبلک ڈیلنگ دا ماسٹر سمجھن لگ پیا ایسے طرح میں درویش‘ صوفی تے سادھو وی سمجھیا گیا شاعراں وچ افسر تے افسراں وچ شاعر سمجھن والیاں دی وی چنگی بھلی گنتی سی۔ نکما‘ نکھٹو‘ بزدل تے یاراں دا یار کہن والے وی سجے کھبے پھردے رہے تے کچھاں ماردے رہے۔ کجھ مینوں بس انسان سمجھدے سن تے یقینا انسان خطا دا پتلا اے تے انسان گھاٹے وچ وی اے۔
کسے ویلے کجھ وی کر سکدا اے تے اوہدے نال کجھ وی ہو سکدا اے۔ اللہ بھیڑے وقت توں بچائے۔ ایہ سی بھان متی دا کنبہ جہڑا مینوں پتہ نہیں کیہ کیہ سمجھدا سی انج اوہناں دا کوئی قصور نہیں لوک مینوں وکھووکھ زاویاں نال ویکھدے نیں تے اپنے حساب نال اپنی رائے قائم کردے نیں تے انج ایہ کمال کردے نیں اوہناں دی مہربانی چلو میرے بارے سوچدے تے ہے نیں میں تے اج تک اپنے بارے سوچیا ای نہیں شیشہ ویکھ کے بناں سوچے سمجھے کنگھی کرکے کسے لئی اپنے وال سنوار لینا واں پچھے مڑ کے ایس لئی نہیں ویکھدا کہ کدھرے اگے دی دوڑ وچ پچھے نہ رہ جاواں انج اگا دوڑ تے پچھا چوڑ دی عملی تفسیر پیش کرنا واں۔ میرے اعمال تے اقوال وچ زمین آسمان دا فرق اے میری سوچ تے رجعت پسندی دے وڈے وڈے جندرے لگے نیں تے ایہناں جندریاں دیاں چابیاں شر تے فتنیاں دے ڈونگھے سمندراں وچ سٹ دتیاں گئیاں نیں تے غوطے لانا میرا مقدر بن چکیا اے۔ہن سوچنا واں میں کون آں ایس گل دی سمجھ تے بلھے شاہ نوں وی نہیں سی لگی۔ جہدے کول سوچن لئی بڑا وقت سی۔ میں تے نوکری وی کرنی ہوندی اے تے نوکری نوں محفوظ کرن لئی چاکری دی وی بہوں لوڑ اے نہیں تے پیڈا ایکٹ توں خیر دی توقع نہ رکھی جاوے۔ ایکٹ رول آف لاء دے عمل نوں یقینی بنان لئی بنائے جاندے نیں تے آرڈیننس زود رنج طبیعت والے بندیاں نوں راہ راست تے لیان لئی منصہ شہود تے آئوندے نیں۔ انج تے قوتاں دا لامتناہی سلسلہ اے کجھ انسان نوں بدنی طور تے مار دیندیاں نیں تے کجھ انسان نوں روحانی طور تے مار دیندیاں نیں تے کجھ مکمل طور تے مار دیندیاں نیں ایس سارے عمل وچ انسان دی تدبیر دا وی عمل دخل اے۔
اوہنے مرنا تے ہے ای ہن ویکھنا ایہہ وے کہ اوہ اپنیاں دے ہتھوں مردا اے یاں غیراں دے ہتھوں۔ اکثر اوقات اوہ مرن دی تھاں دوہاں دے نال ہتھ وی کر جاندا اے۔ چوراں نے پے گئے مور۔ مور ناچا کس نے دیکھا ویکھن نال چیزاں نمایاں ہوندیاں نیں۔ تے میں نمایاں ہون دے شوق وچ 54 ورھے گزار دتے تے اجے تک مینوں کدھوں پار کوئی نہیں جان دا‘ حالاں کہ میں صبح سویرے نہا دھو کے چنگے کپڑے پنا واں پرفیوم نال اپنے وجود دی کلی کھلانا واں تے فیر اٹھ دس چیزاں دا ناشتہ کرکے ڈکار وی ماردا وڈے وڈے لوکاں وچ بہہ کے وڈا بنن دی کوشش وی کرنا واں منزل دے نیڑے جا کے میری لت کھچ دتی جاندی اے تے میں اوتھے دا اوتھے ای نہ تیتر نہ بٹیر۔ظاہری طور تے میں کولھو دا ڈھگا واں‘ جو گھم پھر کے اک ای تھاں رہندا اے۔ ہن باطنی طور تے وی پرواز کیتی جا سکدی اے ہو سکدا اے اندر وی کوئی ہووے تے اوہ مینوں میری حقیقت دس دیوے تے میں اپنے آپ نوں جان کے اپنے صحافی دوستاں دا مطالبہ پورا کر سکاں۔ آ اپنے اندر جھانک کے دیکھتے ہیں اف اللہ ایہ تے اک بحربے کراں اے۔ میرے خوبصورت چہرے نے مینوں رب دا شاہکار بنا دتا اے۔ میریاں اکھاں نے مینوں قاتل حسینہ تتے جے میں سوچ دی عینک لا لواں تے قیامت کبریٰ اے۔
دند میرے موتی دیاں لڑیاں نیں تے غصے وچ جدوں چاہواں ایہناں نوں پیس کے جذبات دا قیمہ بنا سکنا واں۔ میرے پھیپھڑے کم چھڈ دین تے چھاں دین والے رُکھ جھٹ وچ سُک جان تے فیر میرا دل‘ اوہدے سامنے تے سمندر دی گہرائی وی مسکین لگدی اے۔ انج زندگی میری کجھ نہیں لگدی بڑی بے وفا اے ایہدے نہ آن دا پتہ اے تے نہ جان دا پتہ اے۔ کاش کوئی میری اگلی منزل دا پتہ دسے تاں جے اوس پتے تے میرے چاہن والے خط و کتابت راہیں میرے نال رابطہ رکھ سکن۔ رابطے ودھان نال روگ بھُل جاندے نیں تے فاصلے ودھان نال لوک بھُل جاندے نیں۔ میں وی تے اپنی اگلی پچھلی منزل بھُل چکیا واں میری سابقہ بھُل چوک معاف کیتی جاوے تے میری روح نوں بدن تے غالب کر دتا جاوے فیر ای میں اپنے بارے کجھ دس سکاں گا۔ میرے ہم وطنو میری ذات دی روح نوں نہ مارو ایس احسان دے بدلے میں‘ میں مٹی نوں سونا بنا دیواں گا ایہ میرا تہاڈے نال وعدہ اے۔٭٭