14اگست
حنیف ساقی
قائداعظم آزادی لئی سبھ کجھ داء تے لایا
چن تے تارے والا جھنڈا اج دے دن لہرایا
سر لائے نیں اٹاں دی تھاں گنھیا لہو دا گارا
فیر کدائیں جا کے بنیا پاکستان پیارا
پاکستان بناون دے لئی بھیناں ویر کہائے
سوکھے نہیں جے لبھدے بھائیو آزادی دے سائے
لٹ دا مال سمجھ کے کئیاں دولت عزت لٹی
مظلوماں مجبوراں اُتے انج قیامت ٹُٹی
ظلم ہنیری انج دی وگی سراں توں چنیاں لتھیاں
عزتاں عزت داراں دیاں لٹیاں پٹیاں گئیاں
ظلم جہانوں وکھرا ہویا ماں نہ پُت سنجھانے
موت کڑاہی دے وچ لاشاں بھجن لگ پئے دانے
کئیاں ماواں اجے وی رکھے ہوئے نیں سانبھ کھڈونے
کھیڈن والے بال جنہاں دے کدی پرت نہیں آئونے
جنہاں اودوں بھرے بڑھولے پاکستان اوہناں دا
پر قربانیاں دیون والے جیوندے نیں بس ناں دا
ایڈے سچے خاب دیاں وی الٹ گئیاں تعبیراں
فرقے بازاں قوم دی چنی کیتی لیراں لیراں
لا الٰہ الا اللہ جے دیس دا مطلب ہندا
رب دے گھر دا اک بندہ ادبوں طالب ہندا
وچ مسیتاں لاشاں ڈگن تھاں تھاں ہون دھماکے
اک دوجے نوں دیون لوکی سچے ہون دے جھاکے
اج کل دیس دی ہر اک نُکر یارو موت نے ملی
مہاجراں لاش کراچی وچوں حافظ آباد دی گھلی
قتل و غارت دے تریہائے دشمن اوہلے بہہ کے
دس ویہہ قتل کرا دیندے نیں ٹیلی فون تے کہہ کے
اج غلامی وانگوں ساقی لگدی پئی آزادی
کوئی فریاد نہیں سن دا ایتھے کون بنے فریادی
