نعت شریف

عبدالحمید نظامی

آقا کرم کماون گے توں پیراں دا پکّا رہو
تینوں دید کراون گے توں پیراں دا پکّا رہو
دل وچ عشق جے سوہنے دا غم نہ کر توں ماسہ وی
لگیاں توڑ نبھاون گے توں پیراں دا پکّا رہو
اکھیاں دے نال چُمیا کر نقشہ پاک نعلیناں دا
تینوں کول بلاون گے توں پیراں دا پکّا رہو
بھار ونڈایا غیراں دا ، اپنیاں دے لج پال دی نے
تیرے دکھ مٹاون گے توں پیراں دا پکّا رہو
انشاء اللہ ویکھیں توں وچ مدینے ہوویں گا
تیرے دن پھر جاون گے توں پیراں دا پکّا رہو
عشق دے سُچے موتی نوں صدق دے دھاگے وچ پرو
کرم دے چھٹے آون گے توں پیراں دا پکّا رہو
ِسر ساقی دے قدماں تے یار نظامیؔ رکھی رکھ
تینوں جام پلاون گے توں پیراں دا پکّا رہو