اسلام زندہ ہوتا ہے ہر کربلا کے بعد

اج امام حسین ؓ دی ذات نوں عملی شکل وچ خراج پیش کرن لئی آپ ؓ دے افکار نوں مدنظر رکھیا جانا چاہیدا اے

عتیق انور راجا

ہر دور وچ خدا اپنے خاص بندیاں دی محبت نوں ازمان لئی ایہناں توں قربانی منگدا رہیا اے۔ تے اللہ دے نیک بندے ہر دور وچ ہر طرح دی قربانی دے کے سرخرو ہوندے رہے نیں۔ اللہ دے اوہ برگزیدہ بندے جنہاں توں اللہ پاک نے قربانی منگی تے اوہ قربانی دے کے سرخرو ہوئے۔ اوہ اج وی پوری دنیا لئی مثال نیں۔ ایہناں دی ہمت و استقلال اج دے مظلوم انسان نوں ظالم و جابر حکمران دے اگے کھڑا ہون دا حوصلہ عطا کردی اے۔ رسول پاک ﷺ نے حضرت حسین ؓ دے پیدا ہوندے ای اپنی پیاری دھی نوں کربلا دے میدان وچ ایہناں دی شہادت توں باخبر کر دتا سی انج ویکھیا جائے تے ایہہ ازمائش رسول پاک ﷺ تے حضرت علیؓ تے حضرت فاطمہؓ دی وی سی۔ ایہناں سب نے حضرت امام حسین رضی اللہ عنہ نوں ایس وڈی قربانی لئی انج دا تیار کیتا کہ امام حسینؓ دے پیر کسے صورت ڈگمائے نہیں۔ اوس حسین ؓدے علم دانش دی انتہا کیہ ہوئے گی جس دا بچپن شہر علم دے موہڈیاں اُتے سوار ہو کے مہر نبوت نال کھیڈدے لنگھیا۔ جس لئی اللہ دے پیارے تے محبوب نبی ﷺ اپنے سجدے لمبے کر دتا کردے سن جس دے دن رات دی تربیت کائنات دی عظیم ہستیاں حضرت علیؓ تے حضرت فاطمہؓ نے کیتی ہوئے ۔
آپ یزید نال جنگ دے ارادے نال یا اقتدار دی خواہش لئی کوفہ ول محو سفر نہیں ہوئے سن بلکہ آپ ؓ اپنے سفر دی حقیقت توں آگاہ سن۔ پتہ سی کہ کوفہ توں بلاوہ کسے ہور وجہ نال اے۔ ایس لئی ای جدوں آپ کربلا دے مقا م اُتے اپڑے تے اپنے رفقا نوں کہیا کہ ایتھے خیمے لا دیو۔ آپ ؓ نوں اپنی منزل نظر آ رہی سی۔ انجام دی پوری خبر دے باوجود آپ اپنے گھر والیاں نکے معصوم بالاں دے نال پورے حوصلے تے جوش دے نال اوتھے اپڑے سن۔ اج اوس امتحان دا ویلا سی جس لئی آپ ؓ نوں بچپن توں تیار کیتا گیا سی۔ آپ ؓ ایہناں ساری مشکلاں دا مقابلہ کرن لئی تیار سن جیہڑی آپ ؓ دے ایمان و استقامت نوں ازمان لئی آپ ؓ دی منتظر سن۔ اللہ پاک نے اپنے سارے پیغمبراں نوں بھُک ، کسے نوں جان دا ڈر، کسے نوں مال دا نقصان ناموس دی حفاظت اولاد دی جدائی تے کسے نوں پیاس دی شدت نال ازمایا۔ پر ہن ویلا اپنے سب توں پیارے نبی ﷺ دے گھر توں قربانی لین دا سی۔ اج اللہ پاک نے اپنے پیارے حبیب ؓ دے نواسے توں اِکـو ویلے ای ساری قربانیاں منگ لیاں سن۔ جان دا خطرہ وی آ پ ؓ دے اگے سی۔ ناموس وی نشانے اُتے سی۔ بھُک پیاس نال نڈھال اولاد وی آپ ؓ دے نال سی پر کوئی بہادر توں بہادر بندا اپنی اولاد نوں اپنے اگے بھُک تے پیاس اور گرمی دی شدت نال تڑپدے ویکھ کے اپنے حوصلے برقرار نہیں رکھ سکدا۔پر امام حسین ؓنے نہ صرف اپنی ذات اُتے دشمن دا ہر جبر برداشت کیتا بلکہ اپنی اکھاں دے اگے اپنے معصوم بالاں نوں بھُک تے پیاس نال تڑپدے وی ویکھیا۔ اپنے ساتھیاں نوں زخماں نال نڈھال وی ویکھیا۔ بیماری ساتھی وی آپ ؓ دے اگے سن۔ اپنی دھیاں، بھیناں تے اپنی دوجی رشتے دار خواتین دے چہریاں توں ایہناں دے اندر دا کرب وی محسوس کیتا۔ وڈی توں وڈی تکلیف وی آپ ؓ دے ارادے نوں متزلزل نہ کر سکی۔ آپ ؓ نوں صرف اپنے رب دی رضا دی فکر سی۔ ایسے مقصد لئی آپ نے ہر مصیبت دا ہر تکلیف دا ڈٹ کے مقابلہ کیتا۔ حق و باطل دی ایہہ جنگ جیہڑی خیر دی بالادستی تے شر نوں ختم کرن لئی برپا ہوئی۔ ایس دا مقصد دنیا نوں ایہہ سبق دینا مقصود سی کہ اصول دے اگے حق دے اگے کوئی رشتہ، کوئی تعلق، کوئی مشکل رکاوٹ نہیں بن سکدی۔ واقعہ کربلا اک نظریہ حیات اے جس دے اندر انسانیت دی بقا دا فلسفہ نظر آندا اے۔ اج دے دور وچ واقعہ کربلا توں سبق لیندے ہوئے دین اسلام دی سربلندی دی خاطر جابر سلطان تے ظالم طاقتاں دے اگے کلمہ حق کہن دی ہمت اپنے اندر پیدا کرن دی لوڑ اے۔ اج امام حسین ؓ دی ذات نوں عملی شکل وچ خراج پیش کرن لئی آپ ؓ دے افکار نوں مدنظر رکھیا جانا چاہیدا اے۔ امام حسین ؓ دنیا لئی بہادری تے استقامت دا اک لازوال سبق چھڈ گئے۔پر افسوس سانوں حضرت امام حسین ؓ دی قربانی دا واقعہ تے یاد اے پر ساڈی زندگیاں وچ عملی طور اُتے ایس قربانی دا کوئی نمونہ اج دے دور وچ نظر نہیں آ رہیا صرف 10 دناں لئی آپ ؓ دی یاد وچ جلسے جلوس تے محفلاں سجائیاں جاندیاں نیں جے مسلماناں نے دنیا وچ عزت نال جینا اے تے ایہناں نوں امام حسین ؓ دے دتے ہوئے بہادری تے جانبازی دے اسباق نوں سارا سال اپنی پوری زندگیاں وچ شامل رکھنا ہوئے گا۔