کچی کُلی

ارشاد کھوکھر

کچی کُلی مِلک اے تیری نہ کر ایویں میری میری
چنگے دے نال یاری لا لے چھڈ مورکھا ہیرا پھیری
خالی ہتھیں آیا سیں توں خالی ہتھیں جاویں گا
رب دے اگے جا کے دس خاں کہڑا مونہہ وکھاویں گا
اوتھے عمل ای ویکھے جانے کسے نہیں ویکھنی ذات وی تیری
کچی کُلی مِلک اے تیری نہ کر ایویں میری میری
جس کم رب نے تینوں گھلیا اوہنوں کیوں بھلایا توں
بھُل بیٹھا ایں سارے وعدے ایہ کیہ ظلم کمایا توں
اجے وی معافی مل سکدی اے نہ کر اینی بوہتی دیری
کچی کُلی مِلک اے تیری نہ کر ایویں میری میری
جہناں لئی توں پاپ کمائے نال نہیں اوہناں تیرے مرنا
دو گھڑیاں اوہناں نے رو کے قبر حوالے تینوں کرنا
ساہ دے نال نیں رشتے سارے مرنے بعدوں خاک دی ڈھیری
کچی کُلی مِلک اے تیری نہ کر ایویں میری میری
رب دے بندیاں نال توں بندیا پیار محبت کریا کر
دوجیاں دا وی سوچیا کر توں کلا ڈھڈ نہ بھریا کر
ہر ویلے ارشاد کریں توں رب اپنے دی شان ودھیری
کچی کُلی مِلک اے تیری نہ کر ایویں میری میری