جگ تے کِتے رُشنایاں نہ ہُندیاں

عبدالحمید نظامی

جگ تے کِتے رُشنایاں نہ ہُندیاں
کدھرے وی کوئی کمائیاں نہ ہُندیاں
کِتے مال و زر اکائیاں نہ ہُندیاں
بچے نہ ماواں ایہہ دائیاں نہ ہُندیاں
نہ ہاسے نہ رونے جھگڑے نہ جھیڑے
کسے وی تھاں تے سمائیاں نہ ہُندیاں
قاضی دے فتوے سزاواں نہ ہُندیاں
جیلاں نہ ہوندیاں لڑائیاں نہ ہُندیاں
نہ بھیڈ نہ بکری نہ مجاں تے گاواں
مکھن نہ لسی ملائیاں نہ ہُندیاں
شکاری نہ ہندے چرندے پرندے
کِتے جال لگدے تے پھائیاں نہ ہُندیاں
رولے نہ گولے نہ پرچے مقدمے
تھانے کچہری گواہیاں نہ ہُندیاں
نہ بہیناں بھرا نہ سجن نہ بیلی
مٹکے نہ کھٹکے صراحیاں نہ ہُندیاں
آدمؑ نہ حوا نہ عیسیٰؑ نہ موسیٰؑ
یوسفؑ دیاں خود نمائیاں نہ ہُندیاں
دھیاں نہ پُتر نہ جنجاں براتاں
میلے نہ ٹھیلے ودھائیاں نہ ہُندیاں
سمجھاں نہ سوچاں ایہہ شاعری نہ ہندی
دانش وری تے لکھائیاں نہ ہُندیاں
پھلاں چ کلیاں دی خوشبو نہ ہندی
قدرت دیاں ایہہ رعنائیاں نہ ہُندیاں
خدا ایہہ بناندا نہ کُجھ وی نظامیؔ
جے سوہنے محمدﷺ نال لائیاں نہ ہُندیاں