امریکی سینیٹ وچ پاکستان دے خلاف بل
ماضی دے حوالے نال جے ویکھیا جائے تے پاک امریکہ تعلقات ہمیشہ اتار چڑھائو دا شکار رہے نیں تے ایہو صورتحال ہن اے
طاہر جمیل نورانی
افغانستان وچ ناکام امریکی حکمت عملی دے حوالہ نال پچھلے دناں امریکی سینیٹ وچ پیش کیتے جان والے Afghanistan counter terrorism بل وچ امریکی انتظامیہ نوں 180 دن دے دتے گئے ٹائم فریم وچ ایہہ واضح کیتا گیا اے کہ مذکورہ دناں وچ ایس بل نوں پیش کرن دے بعد افغانستان توں امریکی فوج دی فوری انخلا دی بنیادی وجوہات نوں سینیٹ دے اگے لیایا جائے تاکہ اصل حقیقت آشکار ہو سکے۔
بنیادی طور اُتے ایہہ بل ریپبلکن پارٹی دے سینیٹر ریش تے ایہناں دے 22 ساتھیاں نے بائیڈن انتظامیہ ولوں افغانستان توں عجلت وچ کیتے انخلا دے فیصلے دی بنیاد اُتے پیدا ہون والے گھمبیر مسائل دے جائزہ لئی کیتے پیش کیتا اے پر حیرت ایس گل اُتے اے کہ مذکورہ بل وچ پاکستان سنے ایہناں سارے ملکاں دے خلاف جنہاں نے طالبان دی کسے وی حوالے نال مدد دی فوری طور اُتے پابندیاں لان دی سفارش کیتی اے۔ سینیٹر ریش تے ایہناں دے ساتھی سینیٹراں ولوں پیش کردہ ایس بل وچ ایس خطرے دا اظہار وی کیتا گیا اے کہ افغانستان توں انخلا دے باوجود امریکہ نوں داعش تے طالبان توں بدستور خطرہ لاحق اے۔
ہن جس دن توں میں امریکی سینیٹ وچ پیش کیتے ایس بل دے مندرجات دا جائزہ لیا اے امریکی سینیٹر دی سوچ تے ایس دی فکر و نظر اُتے حیرانگی ہون لگی اے جس پاکستان دے خلاف پابندیاں عائد کرن دی سفارش کیتی اے ایہہ اوہ ای پاکستان اے جیہڑا 2001 توں امریکہ نال مسلسل تعاون کردا رہیا۔ ایہہ اوہ ای پاکستان اے جس نے افغانستان وچ امن دی بحالی تے امریکی فوج دے انخلا وچ سہولتاں فراہم کیتیاں۔ ایہہ اوہ ای پاکستان اے جنہوں امریکہ دی 20 سال تیکر لڑی جنگ وچ بطور اتحادی 80 ہزار جاناں دا نذرانہ پیش کرن دے علاوہ کئی ملین ڈالرز نقصان نال دوچار ہونا پیا۔ بلاشبہ ایہہ اوہ ای پاکستان اے جس نے دوحہ وچ امریکہ تے طالبان دے مابین مذاکرات کران وچ کلیدی کردار ادا کیتا پر افسوس ! صد افسوس ! کہ سینیٹر ریش نے سب کجھ ویکھدے، جان دے تے سمجھدے ہوئے وی پاکستان دے خلاف پابندیاں عائد کرن دی سفارش کر دتی اے۔ مہذب دنیا جان دی اے کہ ایس بل نوں پیش کرن دا بنیادی مقصد پاکستان اُتے امریکی دبائو ودھانا اے۔ دنیا ایہہ وی چنگی طرح جان دی اے کہ امریکہ چین نوں ہن چونکہ اپنا حریف سمجھدا اے ایس لئی اوہ ہر گز نہیں چاہندا کہ پاکستان تے چین دے پختہ تعلقات وچ مزید استحکام پیدا ہوئے۔
ایسے مہینے ایف اے ٹی ایف دی گرے لسٹ توں باہر نکلن لئی پاکستان دے صرف اک پوائنٹ اُتے وی جوبائیڈن انتظامیہ دی نظر مرکوز اے جد کہ حالات وچ سرد مہری دی جھلک وی عیاں اے سینیٹر ریش نے پاکستان دے خلاف پابندیاں دی سفارش توں پہلاں کاش ایہہ وی سوچ لیا ہوندا کہ ایہناں دے جوائنٹ چیفس آف کمیٹی جنرل Mark Milley نے امریکی ایوان نمائندگان دی کمیٹی برائے مسلح افواج دے روبرو ہو کے کیہ خوفناک انکشاف کیتا اے۔ اے ایف پی دے مطابق جنرل مارک ملی نے بغیر لگی لپٹی ایہہ واضح کر دتا کہ امریکی افغانستان وچ اپنی 20 سالہ لمبی جنگ ہر گیا تے ایہہ جنگ ایہناں شرطاں اُتے اختتام پذیر نہیں ہوئی جیہڑا اسیں چاہندے سی ایس طرح امریکی سینٹرل کمانڈ دے سربراہ جنرل F.Mackanzy نے وی ایوان نمائندگان کمیٹی نوں دسیا کہ اوہناں نے وی خبردار کیتا سی کہ افغانستان توں مکمل انخلا نال افغان فوج تے افغان حکومت بٹ جائے گی تے اج ایہو ہویا اے جوائنٹ سٹاف جنرل ملی نے ہن فیر خبردار کیتا کہ افغانستان وچ موجود القاعدہ دے دہشت گرد اک سال دے اندر اندر امریکہ لئی دوبارہ خطرہ بن سکدے نیں۔
ایہناں سارے تربیانات، واقعات تے مستقبل وچ متوقع درپیش خطرات دا جے عمیق نظری نال جائزہ لیا جائے تے بلاشبہ ایس حقیقت توں انکار ممکن نہیں کہ امریکی افواج دا افغانستان توں فوری انخلا دے پس پردہ واقعی امریکہ دی اوہ سٹرٹیجک ناکامی اے جس نے ایس دی سپرقوت نوں ہلا کے رکھ دتا اے۔ فورسٹار جنرل مارک ملی نے جوبائیڈن دے اعلیٰ فوجی مشیر وی نیں۔ نمائندگان دی کمیٹی برائے آر مڈفورسز وچ جس دلیری نال اصل حقائق نوں بے نقاب کیتا اے، امریکہ دی فوجی تاریخ وچ یقینا ایہنوں افسوس اُتے مبنی حروف وچ لکھیا جائے گا۔ ریپبلکن سینیٹرز دے تجویز کردہ ایس بل اُتے وزیر خارجہ شاہ محمود قریشی نے وی بغیر لگی لپٹی لندن وچ دوران پریس کانفرنس وچ ایہہ واضح کر دتا کہ ایس امریکی اقدام اُتے پاکستان قطعی چپ نہیں رہوے گا۔ ایہہ بل ایہناں سینیٹرز دی اختراع اے جیہڑے بائیڈن حکومت دی پالیسیاں توں متفق نہیں۔ ایہہ نقطہ امریکی ایوان نوں وی سمجھنا ہوئے گا کہ اوہ پاکستان جس نے دہشت گردی دے خاتمہ تے افغان امن وچ امریکہ دا بھرپور ساتھ دتا۔ 20 سال دی پرائی جنگ وچ جاناں دے نذرانے سنے ملین ڈالرز دا نقصان چکیا تے ایہناں ساری قربانیاں دے باوجود پاکستان نال ایس طرح دا معاندانہ سلوک قابل افسوس اے۔ ایس لئی انج دے حالات وچ اپنے مفادات دے تحفظ لئی اسیں ہر گز نہیں جھکاں گے۔ ماضی دے حوالے نال جے ویکھیا جائے تے پاک امریکہ تعلقات ہمیشہ اتار چڑھائو دا شکار رہے نیں تے ایہو صورتحال ہن اے۔ ایہنوں حسن اتفاق ای کہیا جا سکدا اے کہ امریکہ دی نائب وزیر خارجہ اج 7 اکتوبر پاکستان دے دوروزہ دورہ اُتے اپڑ چکی اے ایس لئی توقع کیتی جا سکدی اے کہ پاکستان دے خلاف پیش کیتے بل اُتے نظر ثانی دا آپشن ضرور استعمال کرے گی۔
