غزل

بیراجی

جھوٹھے جذبے سچ دے سر توں واراں گا
آپنے ماں پیو والا قرض اتاراں گا
جھولی دے وچ پا کے خشبو پیاراں دی
گلی گلی وچ چانواں نال کھلاراں گا
کیہ ہویا جے جیبھاں ٹکیاں ہوئیاں نیں
اکھیاں دے نال ویلے نوں للکاراں گا
کوئی نہ آوے میرے گھر تک دہشت لئی
ولگن شہر چوگردے آپ اساراں گا
پتھراں دے کھرلاں وچ پا کے زہراں نوں
کشتیاں وانگوں گھوٹ گھوٹ کے ماراں گا
دل دی دھرتی پیار محبت منگدی اے
اوہدا سینہ ہنجواں دے نال ٹھاراں گا
رستے دے وچ کندھ بنا کے نیکی دی
آپنے سر دا صدقہ آپ اتاراں گا
کوئی وی اکھیں ویکھ کے موہرا کھاندا نہیں
پر سجناں لئی جتی بازی ہاراں گا
میرے ساتھی منکر کولوں ڈردے نیں
میں کلاّ شیطان نوں روڑے ماراں گا
پچھلی عمرے سمجھ آئی اے بیرا جی
آپنی چادر ویکھ کے پیر پساراں گا