غزل

محمدحنیف ساقی

صدیاں وارث پیر دیاں تحریراں سانبھ کے رکھیاں نیں
شعراں اندر ہیر دیاں تصویراں سانبھ کے رکھیاں نیں
وارث شاہ جنڈیالہ چھڈ کے کہڑی جوہے لکیا ایں
ہیراں تیرے خاب دیاں تعبیراں سانبھ کے رکھیاں نیں
قلم قبیلے وچوں نکھڑن والیا آ کے ویکھ تے سہی
ویلے‘ تیرے علم دیاں تنویراں سانبھ کے رکھیاں نیں
ماں بولی دی سوکن تے چدھرانی بننا چاہندی سی
ماں بولی دیاں لجاں بھیناں ویراں سانبھ کے رکھیاں نیں
اوہناں نوں وی وارث شاہؒ دے وانگوں موت نہیں آ سکدی
ماں بولی دیاں جہناں وی توقیراں سانبھ کے رکھیاں نیں
وارث تیری ہیر کتابے سارے رنگ حیاتی دے
تیرے ہر اک مصرعے نے تفسیراں سانبھ کے رکھیاں نیں
نانک، بلھا، باہو، لعل، فرید، ای ساقی وارث نیں
ماں بولی دیاں پگاں پاک فقیراں سانبھ کے رکھیاں نیں