لال ہنیری

طاہر وزیر آبادی

چوہاں پاسے لال ہنیری
ات گردی تے ہیرا پھیری
روز دیہاڑی بمب دھماکے
کدھرے چوری کدھرے ڈاکے
ہوکے‘ ہاواں‘ ہاڑے ویکھو
سجنا ہتھ کوہاڑے ویکھو
ویکھو کالی رات دا منظر
سوہنے شہر سوات دا منظر
آدم زاد متانا ہویا
سڑ کے کولا وانا ہویا
رت نچڑی اے ناڑاں وچوں
سڑیا لوک پہاڑاں وچوں
جھولی پے گئے فاقے ویکھو
تھاں تھاں روز دھماکے ویکھو
اگاں وچ بزاراں ویکھو
مر گئے لوک ہزاراں ویکھو
لہور‘ پشور‘ کراچی‘ پنڈی
چوہاں باہی اگ ہے کھنڈی
بڈھے‘ بچے موئے جوان
بمباں کیتا رج نقصان
لکھ لعنت مردوداں تائیں
چکے رب نمروداں تائیں
دیس میرے دے دشمن سارے
رب کرے سب جاون مارے
سوچ پلیتی وچ انسان
بھلدا جاوے رب رحمان
زہری بمب چلائی جاندے
رب دا عرش ہلائی جاندے
بے دوشاں نوں ماری جاندے
طاہر سانجھ وساری جاندے