میری وگڑی گل بنا دے

عبدالحمید نظامی

بابا جی کرم کما دے میری وگڑی گل بنا دے
دلی تے اجمیر وچوں تساں کیتی خوب کمائی
صابر تے نظام دے صدقے دُنیا تے ورتائی
میں ہاں تیرے عشق دا روگی مینوں وی کوئی دوا دے
بابا جی کرم کما دے میری وگڑی گل بنا دے
آ بیٹھے آں تیرے در تے باباجی درداں مارے
سکھ نے وی دُکھ دِتے مینوں چل گئے غم دے آرے
گھمن گھیری وچ نہ پئے جاں مینوں وی کنڈے لا دے
بابا جی کرم کما دے میری وگڑی گل بنا دے
تیرے دم دے صدقے بابا ہویا نور سویرا اے
پاکپتن دی روشنی پارو چمکیا چار چوفیرا اے
تیرے در دا سگ نظامیؔ خیر وصل دا پادے
بابا جی کرم کما دے میری وگڑی گل بنا دے